WILLEMSTAD.- Shofùrnan di bus ta hopi indigná pa ku aplikashon di NOW. Pasombra ta bastante kos nan mester yena i hasta pa bai kurso. Si no yena asuntu di kurso, nan no ta bini na remarke pa haña NOW, ta loke ku presidente di sindikato STU (Sindikato Transporte Uni) sr. Andres Everitz a bisa EXTRA. El a indiká ku e trabounan ta masha tantu i kada biaha e tin di intervení, i tene reunion pa shofùrnan di bus, ku ainda no por organisá un elekshon. T’asina ku for di sèptèmber STU a anunsiá pa un reunion general anual pa djadumingu awor 23 di òktober. Den e reunion aki tambe lo a prepará pa elekshon di un direktiva nobo pa STU.
Sr. Everitz a indiká ku a posponé e reunion, pasombra trabounan ta hopi pa atendé, spesialmente aplikashon di NOW.
E presidente a sali manda mensahe pa e minister nobo nobo di MEO, sr. Cijntje ku a yega ora pa laga los poko pa e shofùrnan di bus pa nan por haña NOW.
Pasombra ta manera un “pia” ke pone pa nan no keda kla ku NOW. Ora ku yena tur rekisito di NOW, te na final si e shofùr di bus no ripara ku e tin di skohe un dje tres treinen ku gobièrnu ta ofresé, e no ta bini na remarke pa haña NOW, pasombra su dokumentonan no ta kompleto. E presidente a bisa ku e kos aki a pasa kuné mes. Nan tin di skohe pa sigui kurso di impuesto, Empresa Chikí, òf Mi Negoshi etc.
Shofùrnan di bus mester a yena pa tres aplikashon di NOW pa lunanan yüni, yüli i ougùstùs. Kada biaha un luna apart. E kos aki no ta fásil. Mester yena bon di ‘gasoil’, kuminda etc. Tin hende e bònnan di gasoil a daña. Ora nan a kere tur dokumento ta yena, esaki no te kaso i nan mester yena mas òf entrega mas dokumento. Tur esaki ta situashonnan di indignashon serka e shofùrnan di bus ku te ainda no a tende nada di NOW.
Otro punto ku sr. Everitz no ta kontentu kuné ta apertura di e parada di bus digital na Mahaai djárason último. E ta lamentá ku no a invitá nan di sindikato pa ta presente. El a bisa ku ta pone atenshon p’e bòrchi, miéntras ku na vários okashon el a mustra riba parada di bus na Otrobanda kaminda tin bankinan kibra i bòrchi, pero nada a ser hasi. I awor kasi gobièrnu kompleto ta bai apertura di un parada di bus.
Finalmente sr. Everitz a bisa ku elekshon lo bini. Ta kada dos aña mester skohe un direktiva nobo. E tin 4 aña sintá kaba. Aña pasa ku e pandemia a stroba elekshon. Pero e lo bai traha riba esaki pronto, el a bisa EXTRA.