WILLEMSTAD.- Miéntras direktiva di CBV a saka karta mustrando nan disgustu ku miembronan ku a bai prensa sakando informashon robes, shopstewardnan ta pidi aklarashon di e direktiva.

Direktiva CBV

A sali algun deklarashon den media despues di algun malkontentu ku un miembro di direktiva kende riba propio inisiativa a tuma su retiro. Direktiva di CBV ta splika den un komunikado pa prensa ku e miembro aki a bai prensa ku konsekuensia ku a saka informashon robes ku intenshonnan ménos bon.

‘Portanan di CBV ta habri pa kada un miembro ku tin pregunta i duda’. Esaki ta palabranan di presidente di CBV, Annaliza Mathilda. ‘E meta di CBV ta pa laga e trahadó den kuida sinti nan bon i skucha i sòru pa e pas laboral tei na tur momentu. Si den nos organisashon tin persona ku nan bista no ta fiha den mesun direkshon ku nos i no ta para pa loke nos ta para pe, e no por ta parti di nos organisashon.’

CBV ta lamentá e loke a pasa pero lo no laga esaki stroba ku nada. Tur dato di for di 3 luna pasá ta aksesibel pa tur miembro. E lema ta ‘Nos ta habrí semper pa risibí nos miembronan i duna nan tur informashon ku nan ta deseá di risibí’ i asina lo keda semper.

Shopstewardnan ke aklarashon

E shopstewardnan a manda karta pa direktiva di CBV kaminda nan ta bisa ku miembro i shopstewardnan ta hañando yamada tras yamada. Tur hende ta mira media i skucha hopi i ta puntra kiko ta pasando. Pa nan shopsteward e kos a kuminsá bira alarmante. Tambe nan a komprondé via di prensa ku djaluna tabatin un reunion di ‘bondsraad’ kaminda ku nan aprobashon a ‘royeer’ 2 miembro di direktiva.

E shopstewardnan ke sa kon por tabata tin un reunion di ‘bondsraad’ i no ta nan tur  a haña invitashon.

Nan ke sa si un reunion yamá asina tin balides? Por bisa kuantu shopsteward a haña e invitashon?  Kuantu shopsteward tabata presente?

Direktiva di CBV por manda pa shopstewardnan di ‘bondsraad’ komo e órgano mas haltu; notulonan i lista di presensia dia a tuma e desishon pa hasi kambio den CBV su regla doméstiko. Tambe ki dia a presentá e kambionan pa  aprobashon, tambe den e reunion ku a wòrdu yamá  15 di ougùstùs lista di presensia di e miembro nan di ‘bondsraad’.

E shopstewardnan ta terminá nan karta ku manera nan Presidente a bisa, CBV ta un buki habri i nan komo shopsteward ta spera di haña e pruebanan /dokumentonan denter di 2 dia.