WILLEMSTAD.- E situashon di shushedat pafó di Stadion Odulio Willems ta un bèrgwensa. No solamente e bista ta mahos i ta mustra kon shushi pais ta, pero e ta un insulto pa deportistanan, e obranan di arte riba e murayanan di stadion i e baluartenan deportivo den e obranan di arte aki.
“Ta hopi dedikashon e artistanan a pone den nan obra riba e murayanan. Falta total di rèspèt na nan, na baluartenan, deporte i deportistanan”, kolaboradó di frakshon di partido KEM, Anthony Godett ta deklará.
“No papia mes di e rumannan Doe i De Willems. Hopi nan a hasi pa deporte. Nan tampoko meresé e trato aki.”
Godett ta hasi un yamada pa promé ku fin di siman hasi un limpiesa i hisa tur e shushinan pafó di e stadion. “Un shushedat enorme kaminda hopi mucha/deportista ta akudí. Partido KEM ta urgi esnan konserní pa remediá e situashon aki rápido na bienestar i rèspèt di e obranan artístiko, e baluartenan i deporte.
Frakshon di partido KEM resientemente a bisa tambe di ta preokupá pa e grado di shushedat riba kaya i den e barionan tin hopi shushedat. “Aña pasá tabata aña di limpiesa pero tòg Kòrsou ta mas shushi ku nunka”, Godett ta indiká.
El a kue bario di Kura Piedra komo ehèmpel kaminda tin un kantidat di shushi kantu di kaminda. Alabes e ta di opinion ku terenonan pará bashí den barionan ta un di e motibunan grandi pa e shushedat.
E terenonan bashí aki ta brote di hopi shushedat i tambe hopi yerba shimaron ku ta krese i krea bistanan mahos. Segun Godett ta gobièrnu tin falta direkto den esaki pasobra ta gobièrnu no ta sòru di duna na esnan ku ta interesá pa traha por ehèmpel kas riba nan.
