WILLEMSTAD. - Manera ta konosí e desakuerdo ku tin entre di partidonan polítiko Republikano i Demokratnan na Merka ta afektando basta sektor i un di nan ta e sektor di imigrashon i tambe seguridat na aeropuertonan na Merka. Esnan ku ta biahando pa Merka e dianan  aki mester tin hopi pasenshi.

E “shutdown” aki tin diaber ku un muraya ku Presidente di Merka Sr. Donald Trump ke konstruí pa mas o ménos 5 bion dòler i ku e demokratnan ta nenga di vota pro e muraya o sea pa e kantidat di plaka ku Trump ta pidiendo.

Esaki a pone ku Trump a paralisá su gobièrnu parsialmente pa motibu ku no tin plaka pa paga e trahadónan. Ya tin mas o ménos 13 dia ku Merka ta den e situashon aki kaminda ku vários 100 mil trahadó ta trahando sin pago.

Esaki a pone ku trahadónan di seguridat na aeropuerto di Merka i tambe di imigrashon a kuminsá mèldu malu ku a haña e nòmber “The Blue Flu” i esaki ta pone ku aktualmente tin filanan largu na aeropuertonan na Merka.

Avionnan ta sali for di Kòrsou ku hopi kurasoleño a bordo pa vários parti di Merka i hopi biaha nan ta baha na Miami pa sigui pa otro estadonan. E filanan ta dje largu ei ku e biaheronan ta teme ku nan ta pèrdè nan buelo di konekshon.

For di biaheronan ku a biaha for di Kòrsou pa Merka EXTRA a komprondé ku nan tabatin un ora den fila pará sin a yega mitar ainda di e fila i esaki tabata na imigrashon so i ainda no a pasa na seguridat.

Aparentemente mas o ménos 80% di e kioskonan ta será.

Un di e trahadónan di seguridat na aeropuerto a duna di konosé ku nan tin debe di paga i esei ta awor aki i no por warda mas.

Ta trata di un empleado ku tin mas di 12 aña ta traha i el a duna di konosé ku esaki ta un preokupashon grandi pa motibu ku un bes aki nan no sa kon pa kumpra kuminda i pone gasolin pa nan por move.

E situashon aki ta pone ku nan moral ta hopi abou i aeropuertonan manera Miami, New York, Dallas, Seattle tin filanan largu ku e konsekuensia ku hopi pasahero ta pèrdiendo nan buelonan i buelonan di konekshon.

E situashon aki ta obligá hopi di e trahadónan aki buska un otro trabou adishonal pa nan por kobra, miéntras ku e “shutdown” ta vigente.

Pues un situashon kompliká, miéntras Presidente Trump ta para duru riba su punto i a bisa ku e no ta lanta e “shutdown” te ora e haña plaka pa e konstruí su muraya entre di Merka i Mexico.