WILLEMSTAD.- Esun ku a kere ku COHO ta duru, mester komprondé ku IMF ta mata e ta mata. Esei segun Luigi Faneyte reakshonando riba e echo ku partidonan ku ta formando e gobienru nobo pa Kòrsou lo a ekspresá e deseo di buska yudansa na IMF.

El a bisa di a tuma nota di e intenshon di partidonan MFK i PNP pa buska yudansa na IMF i esei tabata un sorpresa, mirando ku ta partidonan ku a bisa di ta kontra Neo Kolonialismo i Neo Liberalismo. I no tin instituto mas Neo Liberal ku IMF i World bank, segun Faneyte.

“P’esei mi a keda sorprendé ora mi a tende nòmber di IMF kai. IMF ta neo kolonialismo. Kisas e polítikonan ku ta bai forma gobièrnu aktual, no sa ku Kòrsou tin eksperensia ku IMF mas di 20 aña pasa, kaminda hopi yu di Kòrsou a haña nan ta bandoná nos pais i buska nan porvenir otro kaminda manera na Ulanda”.