WILLEMSTAD.- Benta di un parti limitá di oro, tòg e kantidat total di e reserva ofisial lo keda meskos, segun Banko Sentral di Kòrsou i St. Maarten (CBCS).
CBCS ta enkargá ku maneho di e reserva ofisial (Centrale Bank-Statuut, artíkulo 9, insiso 1). E maneho akí tin tres ophetivo. Di esun mas te esun ménos importante, nan ta 1) mantené e balor di e reservanan (e riesgo di pèrdida di invershon mester ta mínimo), 2) likides (e mester ta disponibel pa transakshon internashonal ku un mínimo di kosto) i 3) rendimentu (generá ganashi pa kubri e gastunan di CBCS).
E komishon interno di invershon ta monitoriá maneho di e reserva ofisial.
E komishon akí ta reuní por lo ménos seis biaha pa aña. Hunta di Komisario tin su propio ‘Investment Oversight Committee’ ku ta reuní por lo ménos kuater biaha pa aña pa papia riba maneho di e reserva ofisial.
CBCS ta evaluá efektividat di e maneho di e reserva ofisial riba un base regular. Na 2019, esei a sosodé ku asistensia di Banko Mundial. Resientemente, a aserká IMF pa asistí den e evaluashon.
Loke CBCS ke evaluá ta kon por oumentá rendimentu di e maneho di e reserva ofisial na un manera duradero i na mes momento reforsá e dos otro ophetivonan, relashoná ku balor i likides di e reserva. Den e evaluashon akí, ta tene kuenta ku e reserva di oro tambe. P’esei mes, un posibel
resultado di e evaluashon lo por ta un rekomendashon pa bende parti di e reserva di oro i invertí e entrada den aktivo ku ta duna rendimentu i ku, no opstante, tin un riesgo di krédito abou for di punto di bista prudente, pero ku ta ofresé ménos instabilidat di preis i un rendimentu mas haltu pa Banko. Esei ta nifiká ku, si akaso bende un parti di e oro, tòg e kantidat total di e reserva ofisial lo keda meskos. Fuera di esei, e kantidat di aktivo ku ta fungi komo márgen di último rekurso, ku
aktualmente ta solamente den forma di oro, tampoko lo no kambia. E úniko kos ku lo kambia ta komposishon di e aktivonan ku ta forma e márgen ei, ya ku, ademas di oro, lo tin mas tipo di aktivo, ku un riesgo abou for di punto di bista prudente, kumpliendo ku e funshon ei. Kompará ku algun otro banko sentral di tamaño komparabel, e parti di CBCS su reserva ofisial ku ta konsistí di oro ta muchu mas grandi.
Si sosodé ku e komposishon di e reserva ofisial kambia debí ku a bende oro, esei lo no bai a kosto di stabilidat di e tasa di kambio fiho di florin ku dòler estadounidense. E stabilidat ei ta keda garantisá. Un bentaha adishonal di kambia komposishon di e reserva ofisial ta ku CBCS su resultado di entrada i gastu lo mehorá. Esei lo ta na benefisio di Kòrsou i St. Maarten tambe, ya ku e lo redusí e chèns ku e paisnan akí lo tin ku kubri posibel pèrdida di CBCS (Centrale Bank-Statuut, artíkulo 34, insiso 3).
Echo ta ku, debí ku ya pa basta tempu e nivel di interes riba e
merkadonan finansiero internashonal ta sumamente abou, e rendimentu ku ta optené via maneho di e reserva ofisial ta bou di hopi preshon. Komo resultado, entrada di CBCS a baha konsiderablemente.
Pa aña 2020, ainda e resultado positivo di 2019 por a kompensá esaki i asina evitá un resultado negativo.
Pa e añanan benidero, CBCS ta trahando riba un plan stratégiko pa prevení pèrdida. Kambia komposishon di e reserva ofisial via benta di oro por bira parti di e plan akí.
Si opta pa kambia komposishon di e aktivonan ku ta fungi komo márgen di último rekurso, esei lo sosodé den konsulta ku Hunta di Komisario.
Ademas, konforme artíkulo 24 di Centrale Bank-Statuut, un posibel kambio di komposishon di e aktivonan ku ta fungi komo márgen di último rekurso lo ser tratá ku e ministernan di Finansa di e dos paisnan promé ku yega na kualke desishon.