WILLEMSTAD.-Despues di e sifra di 51 kaso nobo di djárason a bira nesesario pa epidemiólogo dr. Izzy Gerstenbluth informá komunidat kon mester interpretá e sifranan presentá. Pa loke ta trata e sifranan pa e fecha di awe Gerstenbluth a duna di konosé ku tin 33 kaso nobo. Di e kasonan nobo 8 ta relashoná ku kasonan konosí. Tin un total di 34 hende ku a rekuperá i tin 8 hende hospitalisá di kua 1 ta den kuido intensivo.

Pa loke ta trata e sifra di 51 kaso nobo di djárason último Gerstenbluth a indiká ku mester wak e ‘positivity rate’ i esei a keda alrededor di 15-20%. Sinembargo mester sea kouteloso i tuma e asuntu aki na serio i evita ku e malesa aki ta plama for di kontrol. Mester wak e kantidat di hendenan riba 65 aña ku a keda infektá. Esaki ta e grupo di hendenan di mas riesgo. Mester wak e hendenan ku ta mas vulnerabel. Si un hende ke sali keiru e mester sikiera kòrda riba e hendenan di edat avanse pasobra ta e grupo ei ta mas vulnerabel. Meskos ta konta pa e hendenan ku tin malesanan króniko. Mas detaye den edishon di EXTRA.