WILLEMSTAD.- “Ami ya a vakuna, mi kasa ta vakuna i mi yu ta vakuna otro siman. Niun síntoma, nada nada. Pa ami e úniko opshon ku nos tin na e momentu aki ta vakuna. I nos a mira e komportashon di e hende ku no ta bon, no tin responsabilidat sosial i no tin disiplina. Bo por mira e hendenan ku dia  a pone lei seku, e hende ta kuminsá e alkohòl den supermerkado i ta bai bebe den outo, ta hasi fiesta, esei ta plama e vírus”.

Dr Cesar Ponce mikro biólogo ta splika EXTRA ku e situashon awor aki ta trese kuné, ku e mihó rekomendashon ta vakuna. Tin hopi informashon ku no ta bèrdat. Por mira nan riba ret sosial i no den prensa formal. El a referí na un informashon ku a Sali resien ku mas di mil hende a muri despues di a vakuna, pero e ta kre ta importante pa puntra, kuantu hende a muri pa NO vakuna?

Vakuna semper tabatin un éksito hopi grandi. Por a mir’é ku sarampi, polio melintis, robela i hopi enfermedat mas. Tur vakuna tin un rísiko pero bo nunka sa si bo ta alèrgiko òf no. Si e personanan ku ta reportá ku a muri despues di a vakuna, mester bisa dikon nan a muri; esei no ta bisa. Pa dr Ponce ta simplemente un koinsidensia òf asosashon ku e persona ta muri ora el a kaba di vakuna, Di otro banda e ta kere ku mester tene kuenta ku si un persona ku ta grandi, kisas 70 òf 80 aña, e tin rísiko di haña ataka di kurason i muri di kualke otro kos.

Na e momentu aki no a hasi análisis dikon e personanan ku ta bisa si a muri despues di vakuna. Ta solamente ora investigá por tin algu serio pa informá.

Otro teoria ku ta bin dilanti ta bisa ku e vírus no ta bèrdat i ta pa kita nos libertat, pero wak den último dos siman kuantu hende hospitalisá, kuantu morto. Promé ku esei nos tabata trankil pasobra no tabatin hopi hende hospitalisá. Awor por mira e kantidat hospitalisá i den kuido intensivo ta haltisimo. Esei ta indiká ku e vírus ta agresivo i ta matando hopi hende i komo no a tuma e medidanan di prekoushon, awor tin e konsekuensianan.

Pa dr Ponce e kos di mas tristu ta ku si tin pashènt di kuido general di otro kos, unda ta bai pone si tur kama den hospital ta yen. Na Kòrsou tin rísiko haltu di ataka di kurason pasobra e poblashon tin sobre peso i preshon haltu, diabétis no kontrolá i tur e hendenan ei dado momentu por haña nan den situashon ku nan tin mester di keda atendé den Kuido Intensivo di CMC pero si CMC yen yen, ta unda ta bai atendé e hendenan ei. P'esei dr Ponce su rekomendashon ta pa vakuna.

“Si bo ta pensa ku e vírus no ta hasi nada i no tin problema, siman pasa a Sali un artíkulo na nivel internashonal ku muchanan tambe ta sufri Covid severo i serka e muchanan e ta dal mas duru si nan keda infektá. Si abo no ta importá pa tin Covid, alomenos protehá bo famia, bo yu. Ami por pensa ku mi ta bieu i a biba kaba pero mi yu ta importante”, dr Pone a terminá.