8 kaso positivo nobo i 8 hende a rekuperá di Covid

WILLEMSTAD.-E resultado pa loke ta trata tèstnan ku e tim di epidemiologia a realisá ta mustra ku Kòrsou tin 8 kaso nobo di hendenan ku a tèst positivo pa Covid-19 i na mes momentu tin 8 hende ku a rekuperá. Esei ta hiba e total na 292 kaso aktivo, asina dr. Izzy Gerstenbluth a duna di konosé. E epidemiólogo a splika ku ta importante pa wak e kantidat di kasonan aktivo, pa motibu ku ta e kantidat di hendenan ku ta malu ta dikta kuantu hende lo mester di kuido mas serio te ku mester bai hasi uso di hospital i kuido intensivo. Den dos dia tras di otro no a detektá muchu kaso di Covid na Kòrsou, pero esei no ta motibu pa kanta gloria asina Gerstenbluth a bisa.

El a lamentá ku ainda tin hende ku tin difikultat pa komprondé ku den kaso ku un hende a tèst positivo anto e mester keda den kas apesar ku e no ta sinti su kurpa malu. Gerstenbluth a splika ku énfasis un bia mas ku mas ku 50% di hendenan ku keda infektá no tin síntoma i no ta sinti malu, pero tòg nan mester keda paden den karentena i isolá pasobra nan por infektá un hende mas debil ku si lo bai sinti tur e efektonan dje malesa. Ta e grupo di 10 pa 20% ku si ta bira hopi malu ta esnan ku mester kuida. Mester pèrkurá pa e kantidat di hendenan malu i ku ta bai hospital no oumentá pasobra esei por nifiká ku despues hospital no tin kapasidat pa atendé hendenan ku tin otro malesanan.

Pa e motibu ei ta importante pa si un hende tèst positivo, e mester keda paden isolá ni maske e no tin síntoma. Ta tenementu di distansia lo yuda prevení otronan di keda infektá.

Pa loke ta trata e paisnan ku ta habri konekshon bèk ku nan Gerstenbluth a splika ku esaki ta nesesario den kuadro di mantené e balansa. Ora habri e destinashonnan ei esnan ku ta gana nan pan di kada dia tambe por biba atrobe. Nan tambe por traha i kobra un salario i hiba un bida normal. Mas detaye den edishon di EXTRA.