Elvin Gerard:

WILLEMSTAD.- E kobramentu di but indeskriminá pa kasonan di hòrtamentu di awa i koriente no por. Parlamentario pa partido Nashonal, Elvin Gerard ta hasi apelashon na tur persona ku a haña un but pa entrante djaluna 27 mei awor mèldu entre 9’or di mainta pa 5’or di atardi na sede di Partido Nashonal riba Winston Churchillweg pa registrá.

Gerard ta bisa ta purba pa wak kon por yega na un solushon pa e kantidat grandi di siudadanonan ku a haña un but di 5.200 florin serka Aqualectra i a kòrta nan konekshon di awa i koriente. “Si por duna kompanianan grandi eksonerashon di mas ku 3 miar florin na debe di impuesto, mester por yuda e grupo di siudadanonan aki pa nan tin aksesibilidat na nesesidatnan básiko manera awa i koriente”, Gerard ta bisa.

E ta rekonosé ku hòrtamentu den niun forma ta bon i ku tur hende ku faya tin ku sufri e konsekuensianan, pero e forma kon Aqualectra ta trata tur kaso igual pa e parlamentario pa Partido Nashonal tampoko ta korekto. “Asta ora un hende kometé un krímen korte ta apliká diferente kastigu dependé gravedat di e akto kometé i bou di kua sirkunstansia esaki tuma lugá”, Gerard ta bisa.

Gerard ta boga pa kambia e sistema di but den unu kaminda ta dependé di e gravedat di e kaso kon haltu e but ta bira. “Ta trata di hendenan òf personanan malu, mamanan soltero ku yu ku no tin e entrada pa paga e but aki”

Ta bin aserka, segun Gerard ta sigui bisa, ku Aqualectra ta eksigí ku ta paga e but aki den un tiru. “No ta sera areglo di pago i Aqualectra no ta hasi distinshon entre personanan ku ta paga tiki tiki i esnan ku no ta paga nada.”

Tambe e ta mustra ku pa Aqualectra no ta importá ku ta un hende ku normal sa paga 50 florin na koriente pa luna i ku a kuminsá paga 25 florin òf un negoshi ku ta hòrta míles di florin pa luna. “Ta tur ta haña e mesun but di 5.200 florin i mester paga esaki den un tiru.”

Aki Gerard ta di opinion ku mester tin un diferensia den trato di parti Aqualectra entre esnan ku ta demostrá disponibilidat pa paga i esnan ku no ta paga ètòl. “Ami, parlamentario Elvin Gerard ta pidi pordon pa tur esnan ku a faya i haña un but, pero e trato ku nan ta risibí no por.”

E parlamentario ta mustra ku tin di e kasonan aki ta hendenan di 60, 70 òf 80 aña, tin di nan den ròlstul asta, ku no sa chèk nan meter pasobra nan no sa kiko eksaktamente nan tin ku kontrolá. “Tin biaha ta un yu, ñetu òf subrino a kita 1 òf dos fase pa drei èrko sin ku nan mama òf wela sa.”

Finalmente e parlamentario ta indiká ku Ministerio di SOAW no ta kubri gastunan di but i pa e motibu aki mester wak kon via gerensia di Aqualectra i/òf minister enkargá ku e kompania di utilidat ta yega na un solushon kaminda ta habri konekshon di awa i koriente bèk pa e hendenan aki. Den nan tin hende grandi, hende ku yu, hende ku ta dialisá, hendenan ku malesa di kurason, hendenan ku otro malesa òf kualke alergia, esta Gerard.