WILLEMSTAD.- Minister di Salubridat di Hulanda Hugo de Jonge djabièrnè último a manda un karta na parlamento hulandes relashoná ku strategia di bakunashon kontra COVID-19. Den e karta De Jonge ta skirbi kiko ta e strategia di gabinete-Rutte den e kaso ku Hulanda por kumpra bakuna ku ta funshoná bon – sin konsekuensia negativo – kontra vírus di COVID-19.
De Jonge ta indiká den su karta ku ta intenshon di Hulanda ku henter poblashon por haña un bakuna. Na promé instansia lo duna prioridat na e siguiente gruponan: hendenan ku tin 60 aña i mas, hende ku tin un situashon di salú ku ta ‘vulnerabel’. E ta konta por ehèmpel pa hendenan ku tin problema ku nan pulmon òf kurason. Tambe hendenan ku debí di nan trabou ta kore un riesgo mas grandi, manera personal di hospital. Despues lo duna prioridat na hendenan ku komo konsekuensia di nan trabou diariamente tin hopi kontakto ku otro hende i tambe persona ku ta traha den industria di agrikultura i di kuminda.
Den e karta De Jonge ta skibi ku Hulanda a disidí, i tambe a palabrá esaki ku e islanan karibense di Reino Hulandes, ku e islanan tambe ta haña un parti di e bakuna na momento ku Hulanda haña nan. Segun De Jonge representantenan di islanan KAS (Kòrsou, Aruba i Sint Maarten ) i BES (Boneiru, Sint Eustatius i Saba) tin kontakto ku Hulanda tokante esaki. Na e momentu aki riba e islanan un inventarisashon ta tumando lugá pa investigá kon por instalá un kampaña di bakunashon riba e islanan.
Islanan di Kòrsou, Aruba i Sint Maarten resientemente a pidi Konseho di Salubridat ( Gezondheidsraad) pa duna un konseho tokante proseso di duna prioridat na e diferente grupo di enfoke pa e trayekto di bakunashon.
Segun De Jonge e konseho na tur probabilidat lo ta kla otro luna. Banda di esaki, segun minister hulandes pa un bon preparashon ta importante ku e organisashon logístiko ta na òrdu riba e islanan.
Segun De Jonge Hulanda a yega na un akuerdo ku islanan BES i KAS mes ta responsabel pa almasenamentu i distribushon di e bakuna riba e isla mes.
Pa esaki e islanan tin ku prepará nan mes pa mantenshon di bakunashon korekto. E Instituto di Reino pa Salubridat i Medio Ambiente (RIVM) lo yuda e islanan ku konseho, tambe RIVM lo kontrolá si e islanan tin e kondishonnan nesesario pa mantenshon korekto di bakunashon.