WILLEMSTAD.- Kooperativanan Uni di Peska (KUP) i Kooperativa Sta. Cruz Beach (KSCB) ta deseá forsa na famia, amigu i konosínan di e piskadó ku a pèrdè su bida durante e último mal tempu siman pasa.

E último 5 añanan aki, kontinuamente KUP i Kooperativa Sta. Cruz Beach ta na mesa ku gobièrnu indikando e importansia pa por koba e entrada pa e bahia na Playa Santa Cruz i traha algun pir. Benefisio di esaki ta entre otro na momentu ku tin mal tempu manera djamars último, piskadónan di den bisindario por yega pa mara nan boto den e bahia skapando nan mes bida i tambe e botonan.

Tur aña den e temporada di orkan piskadónan ta keda alerta pa laman ku por lanta ku ta konosí komo ‘rondzeil’, bientu i laman ku ta bòltu bini di zùit wèst. Laman ta bira hopi brutu ku tur e konsekuensianan ku esaki ta trese kuné. Un ehèmpel di esaki ta lokual a pasa djamars último. Kooperativa Sta. Cruz Beach a keda serka pa hopi piskadó ku ta sklama pa por tin un infrastruktura na drechi pa asina nan por hasi nan trabou di peska den un ambiente muchu mas sigur (safe) i digno.

Pa un persona ku no ta den e profeshon por komprondé, entre otro na Lagun piskadónan tur dia di nobo ta hala nan boto na man baha na awa i na momentu ku nan regresá ku tur e kansansio di tabata riba laman hinter dia, nan mester hala boto na man i subi riba tera bèk. Tur esaki pa bai piska pa por abastesé pueblo di Kòrsou ku piská fresku. Si tabatin un infrastruktura adekuado na Santa Cruz, piskadónan di besindario por bini ku nan boto i mara esaki na Santa Cruz.

Piskadónan a yega na e punto ku ta eksihí gobièrnu pa awor si invertí den e bahia di Santa Cruz di manera ku nan por bai mara nan botonan den e bahia.

Mama naturalesa a sòru pa e mayoria parti kaba. Ta solamente mester koba kaminda ku tera di seru a yena den e bahia hasiendo esaki “ondiep” i traha sufisiente pir. Lokual ku ta remarkabel segun e kooperativanan, ta ku sigur na 3 okashon gobièrnu a manda hendenan di kontratista pa por midi e hanchura i profundidat di e bahia. Kada biaha ta duna e mesun vershon ku ta midi pa trabounan por start pero ta keda solamente na midimentu i nada konkreto pa ku kobamentu mes i seguidamente trahamentu di pir.

Na aña 2016 Kooperativa Sta. Cruz Beach a entregá un plan pa ku kobamentu, amplia ‘slipway’, renobá kas di piskadónan i tambe trahamentu di sufisiente pir. E parti di kobamentu i trahamentu di pir a keda adaptá na 2 okashon riba indikashon i rekomendashon di funshonarionan di GMN pero te asta dia di awe nada ehekushon.

KUP i KSCB a bolbe aserká gobièrnu riba e tópiko aki pero a tende ku no tin fondo pa por realisá e proyekto. Un gobièrnu ku ta serio i ku ta duna balor na su siudadanonan ku ta sòru pa pone alimento di kalidat riba mesa den forma di piská fresku, lo sòru pa por tin e fondonan nesesario pa asina fasilitá e piskadónan pa nan por ehersé nan profeshon den un ambiente safe i digno.