WILLEMSTAD.- Nos ta drentando praktikamente e último 10 dianan di e gobièrnu aktual. Minister saliente enkargá ku finansa Kenneth Gijsbertha a duna un bista kon gabinete Rhuggenaath ta bai laga Kòrsou finansieramente.

Ta bon pa tene kuenta ku ora sr Gijsbertha a asumí e responsabilidat komo minister di finansiero, tabata na mei 2017 i e debe nashonal tabata 2.1 bion miéntras ku na e momentu aki debe nashonal ta 3 bion. Esei ta un oumento di kasi 747 mion florin durante di 4 aña ku e gobièrnu aktual a fia adishonal segun minister saliente Kenneth Gijsbertha.

E fiansa di 668 mion ta debí na NOW i ta debí na e pandemia. Di e 668 mion, 53% tabata pa kubri e ménos impuesto ku Kòrsou a risibí durante periodo i e otro 47% tabata pa duna NOW i sostené e ZZP’er pa mantené kuponan di trabou.

“Un fiansa ku nos a hasi a kosto di e pandemia ku nos a haña nos aden. I tin tambe un parti, mas òf ménos 80 mion ku nos a refinansiá. E dos aspektonan ei ta e úniko momentu ku nos a oumentá nos debe nashonal”, segun sr Gijsbertha.

Si wak bèk promé ku e pandemia, tur kos tabata indiká ku den 2020 Kòrsou lo tabatin kresementu ekonómiko. I e kresementu ekonómiko ei lo tabata sumamente positivo pa tantu presupuesto pero tambe desaroyo di ekonómiko i kupo di trabou, pero lamentablemente Covid a kue mundu henter i Kòrsou no a skapa di dje.

Pa loke ta e kandela na Ontvanger tambe a pone ku gobièrnu a risibí muchu ménos na entrada.

Segun minister Gijsbertha, si tur hende a kumpli manera mester tabata Kòrsou lo no mester a hasi fiansa.

I lo no tabatin motibu tampoko pa tin défisitnan riba presupuesto. “Si nos mira ku na 2017 tabatin 116.8 mion défisit i na 2018, 58.5 i si bisa den 2019, 40 mion i pone nan huntu mes nos ta papiando di un 200 mion mas òf ménos, pero nos tin mas di 800 mion riba kaya di impuesto, ku hende no a paga manera mester ta. Si nos entrada di impuesto kana normal, nos lo no tabatin défisit den e añanan anterior tampoko”.

I p’esei minister Gijsbertha ta hasi un apelashon riba tur pa empresa i individual, kumpli ku kaha di gobièrnu. Semper hende por bisa ku tin situashon ekonómiko presente ku empresanan no por kumpli pero si no hasi esei bo ta hinka e pais den otro problema, pasobra e gobièrnu mester hasi fiansa òf tuma medida. I si mester hasi ‘bezuiniging’ den ekonomia ku ta krem, un ekonomia ku mas di 20 aña sin kresementu,  e ta hasi mas daño. “Si nos ta kumpli ku impuesto nos lo no a yega un situashon manera na e momentunan aki”, minister Gijsbertha a enfatisá.