WILLEMSTAD.- Lider polítiko di Partido Nashonal di Pueblo (PNP), sra. Ruthmilda Larmonie-Cecilia a firma e akuerdo di gobernashon siman pasá ku sintimentunan miksto. Asina e lider polítiko a duna di konosé durante su diskurso despues di a basha su firma. Segun sra. Larmonie, e gobièrnu aki sin mas ta drenta ku tur bon intenshon i determinashon pa traha pa pueblo di Kòrsou, pa saka e pueblo for di e krísis ku e ta. El a sigui bisa ku, durante e trayekto di kampaña, siguí pa elekshon i tambe formashon nan por a ripará ku den e komunidat aki tin muchu mas tantu ta pasa ku solamente krísis ekonómiko, krísis sosial, i krísis kon ta atendé ku oro komo ser humano.

No lubidá ku nos a bibando den un situashon sumamente difísil. Pero kon ta hasi rekuperá i Sali for di e situashon aki, si e pueblo no realisá ku nos tin di traha huntu, ku tin di duna otro oportunidat. A huntu di bai karga e reto aki. No ta un kuestion di 9 minister huntu ku un parlamento, i nan tin di bai resolvé e problemanan riba nan mes. E ta nifiká ku nos kada unu tin un responsabilidat di yuda pa logra e meta, kual a sòru pa Kòrsou por Sali dilanti i pa por tin un futuro pa nos yunan i nietunan.

Sra. Larmonie a hasi un apelashon serio riba pueblo di Kòrsou. Partidonan a bisa ku lo bai goberná i traha huntu ku e pueblo i pa e pueblo, pasobra aworakí a yega momentu ku pueblo tin di haña espasio i e alivio. Pero den e mesun rosea e pueblo di su banda tambe tin di duna su sosten.

E lider polítiko a enfatisá ku nos komunidat lo bai pasa den un periodo duru, ku desishonnan sumamente profundo. Pero laga kada desishon ku ser tumá ta bon inkalkulá ku no tin nodi tuma e mesun desishon den futuro. “Ta nos konhuntamente mester traha riba e kambio. Nos lo kana dilanti, nos lo mustra e direkshon, i nos lo bini ku e vishon. Pero lo mester di kada yu di tera pa sostené i sigui kana e kaminda”, el a deklará.

Ora bo ke yega na prosperidat, na momentu ku bo ta transmití positivismo i e gana pa ban lucha huntu, e dia ei nos lo yega. Pero si nos keda den un komunidat unda nos ta bringa otro, sembra odio  kaba ku otro komo ser humano, anto hamas i nunka e pais aki lo por prosperá.

Atrabes di añanan nos pueblo a demonstrá ku nos ta hendenan fuerte, ku nos lo por kai, pero ku nos ta bin bèk. Pero e ta komprometé su mes di traha pa e lugá aki, ora di trabou ta yegando pa nos tur. I nos lo no logra pensando ku nos por sinta patras i kere ku nos lo ser sirbí.