WILLEMSTAD.- E bishita, deklarashonnan, intenshon i promesanan di sr. Manuel Quevedo ta notisianan alentador i Refineria di Kòrsou ta aploudí esaki. I den kaso ku nan ta den e posishon di start e refineria bèk nan lo por konta ku apoyo di Refineria di Kòrsou. Asina e direktor di RdK, sr. Marcelino “Chonky” de Lannoy a duna di konosé den un reakshon na EXTRA en konekshon ku e bishita di sr. Quevedo di Venezuela. Manera ta konosí sr. Quevedo a ekspresá e deseo atrobe di parti di PDVSA pa kontinuá ku e operashonnan despues di 2019, i asta a bisa ku lo bai start e refineria den e luna benidero. Mester bisa di otro banda ku gerensia di PDVSA algun luna pasá a duna di konosé nan ta duna garantia riba pago di salario te ku fin di ougùstùs 2019.

Biniendo bèk riba e kòmbersashon ku sr. de Lannoy, esaki a splika ku echo ta ku e refineria tin 9 luna pará kaba, i si ne momentunan aki un dje figuranan mas haltu den herarkia hasi un bishita di kortesia i deklará ku lo bai start e refineria di nobo, ta algu ku RdK ta aploudí, e ta trese alivio pa tur hende, sigur pa e trahadónan. Ta un hopi bon notisia. Banda di esei, algun tempu pasá PDVSA a ekspresá den un karta e disponibilidat pa sigui ku e operashonnan, loke ta duna aun mas speransa. Es mas, e por nota ku e bishita aki a trese trankilidat serka trahadónan tambe. Si nota e efektonan di e bishita aki, anto e ta kere ku tin di apoyá e bon intenshonnan.

Un sr. de Lannoy ku hopi koutela a splika EXTRA ku di un banda tin deseo i promesanan hasí, pero mester por kumpli ku nan tambe. Primeramente lo no ta fásil pa start e refineria pa motibu di e sanshonnan ku tin imponé riba Venezuela i tur hende sa esei. Si startmentu tabata algu fásil e refineria lo no a keda para 9 luna. Pero laga nos ban wak, pasobra RdK no ta operador di refineria.

Den kaso ku PDVSA ta kla pa start e refineria atrobe, solamente RdK lo apoy’é, aunke esaki ta un promesa ku nan a hasi den pasado kaba sin por a kumpli kuné.

Mas aleu e direktor a splika ku di parti di RdK tin hopi a ser hasí den pasado pa asina por tin garantia di pago dje salario di trahadónan, pues si PDVSA por start e refineria atrobe, e por konta ku e apoyo.