“Ta tempu pa papia di nikotina”; Un kambio importante pa sigaria alternativo

Ta tempu pa papia di Nikotina, esei tabata tema di e foro mundial resientemente na Varsovia Polonia. Durante di e foro, ku a konta ku partisipashon di mas di 500 persona for di tur sektor, tabatin tambe un variedat di presentadó. For di dòkter, sientífikonan pero tambe representante di e diferente formanan di sigaria alternativo manera esun ku ta kenta e tabako, vapor i sigarianan elektróniko i eléktriko. Nos di EXTRA tabata presente na Varsovia, kaminda den hotèl Marriott a tuma lugá e presentashonnan.

GFN ta e úniko konferensia mundial riba nikotina.....

E foro tabata siman pasá 13, 14 i 15 di yüni ku mas di 80 eksperto lidernan mundial den nikotina, enfermedatnan relashoná ku tabako, salú públiko, formulashon di maneho, siensia i teknologia. Global Forum on Nicotine GFN ta e úniko konferensia internashonal ku ta konsentrá riba e ròl di proyektonan di nikotina mas sigur ku ta yuda e hendenan stòp di huma.

E proyektonan di nikotina mas sigur ta esnan ku ta inkluí sigaria elektróniko (vapes), tabako oral manera snus sueko i produktonan di tabako ku no ta kima pero solamente ta bira kayente manera e IQOS di Philip Morris International.

Kada seis sekònde, un persona ta muri di un enfermedat relashoná ku humamentu. Mitar di esnan ku ta huma ta muri di un enfermedat ku ta direktamente relashoná ku su uso di tabako. Ta kalkulá ku sigarianan elektróniko ta 95% mas sigurá ku huma un sigaria normal.

Profesor Gerry Stimson, profesor emérito di Imperial College na London i direktor di e programa di GFN riba Nikotina a bisa “sigaria ta un mekanismo sushi si usa nikotina. E proyektonan manera sigaria elektróniko, snus i e produktonan di kenta i no kima , tur tin un kos komun i esei ta ku nan no tin kandela ni huma”.

David Sweanor profesor  athunto di e fakultat di derechi i presidente di e hunta asesor di sentro di derechi, polítika i étika di salú di universidat di Ottawa a bisa na su turno ku na Suesia tin un porsentahe masha abou di enfermedatnan relashoná ku tabako den Oropa; nan no ta huma, nan ta snus. Den último 10 aña for di momentu ku a introdusí snus na Noruega, e benta di sigaria a redusí na mitar. Na Hapon, e yegada den merkado di e sistema ku ta kenta i no kima a redusí e merkado di sigaria den un tersera parti den tres aña. El a bisa ku nan ta logrando e progreso aki apesar di e desafionan ku nan ta enfrentando manera regulashon defisiente, informashon di kalidat malu, falta di insentivo pa kambia di sigaria. E ta bisa ku djis imaginá kuantu lo logra mundialmente si simplemente produktonan di nikotina mas sigur keda aseptá.

Samrat Chowdhery lider di defensa di konsumidónan na India a enfatisá riba e redukshon di daño pa tabako pa e usuario di produktonan di tabako i e peliger di huma. El a enfatisá durante di e presentashon ku India ta e di dos konsumidó mas grandi di tabako na mundu. 275 mion di konsumidó ta usa tabako.  El a bisa ku nan mester aprobá mas medida preventivo, na mes momentu ku nan ta pone mas esfuerso den redukshon di e daño di tabako ku ta disponibel pa personanan ku mas tin mester di esaki.

Loke a hasi e foro aun mas interesante ta ku no ta humadónan òf negoshinan ku ta bende e produktonan alternativo aki so tabata presente, pero tambe hendenan kontra di humamentu i kontra di asta e alternativa pa humamentu.

E tema di e aña aki ta reflekshoná e loke e grupo ke logra pa trese diskushon i debatenan pa e forma nobo, remplasando e lenguahe di kontròl di tabako, analisando aktitutnan pa loke ta uso di nikotina i tambe konsiderando e parti positivo i potensial di e benefishinan di su uso.

E influensia di e konsumidó ta éksito pa sigui krese i oumento di polítikonan ku ta kuminsá rekonosé e nifikashon di redukshon riesgoso di tabako. Banda di esaki ta sigui e malinterpretashon via algun medio di e duda den mente di polítikonan, reguladónan i públiko. I den e kuadro aki e programa amplio di e foro global riba nikotina pa atendé ku sierto tópikonan ku ta krese konfushon.

Nos por menshoná ku na Polonia e forma di atendé ku sigaria alternativo a kambia. Lei na Polonia relashoná ku vaping den áreanan públiko a kambia, esaki komo resultado di nan interpretashon i implementashon di EU TPD i den e kuadro aki a pone atenshon riba e maneho di vaping durante di e konferensia aki, netamente na Polonia mes. I den e kuadro aki tambe e organisadónan a logra yega na un akuerdo ku e hotèl Marriott den e kaso aki kaminda e foro a tuma lugá pa pone un kamber komo Vaping Room, pa esnan ku tin deseo na usa esaki.

Un di e énfasis nan durante di e foro sigur tabata kambio pa sigaria alternativo pa kontribuí na salú.

Tommaso di Giovanni....

Un di e kompanianan ku tabat’ei presentá ku investigashonnan avansá ku nan a hasi ta Philip Morris International. I EXTRA a papia ku Tommaso di Giovanni direktor di komunikashon global pa Philip Morris International. PMI ta e kompania di tabako lider den e ambishon di remplasá sigaria ku produktonan sin huma basá den siensia, ku ta un opshon hopi mihó ku sigui huma. Su prioridat ta krea e konsenshi global di e oportunidat presentá pa e inovashon, siensia i teknologia pa logra un mundu liber di huma. Tambe e ta responsabel pa sostené e afiliadonan den mundu kompleto den nan esfuersonan pa kompartí e vishon di PMI pa un futuro liber di huma ku medionan di komunikashon i otro partidonan interesá.

Den e kombersashon ku nos el a enfatisá riba leinan di humamentu ku mester keda di update. Tin paisnan manera Merka i Italia ku ta wak den e direkshon ei i tambe por menshoná New Zeeland ku a bin ku kambionan. E ta kere ku ta un oportunidat ku ta keda benta afó si no atendé, pa e 1,1 bion di humadónan ku tin. E hendenan ei mester keda enkurashá pa e alternativa di sigaria.

Den kaso di PMI el a bisa ku nan ta hasiendo loke nan por komersialmente pasobra nan ta kere ku nan tin un ròl pa kambia e hendenan aki. Ya a logra kambia 7,3 mion i tin 3 mion mas ta kambiando. Si wak ku na Hapon 22% di e humadónan a kambia pa e sigaria alternativo. Ta trata aki di un inovashon grandi den salu públiko ku nan a logra, asina Tommaso a indiká. I e ta kere ku diálogo i trabou huntu nan por logra trese solushon kue inovashon aki.

E ta konsiderá e foro mundial komo un éksito pasobra e ta trese diálogo entre gobièrnu nan, sientífikonan, industrianan, hendenan pro i kontra. I tur huntu bou di un dak, Diálogo ku asta e krítikonan ta masha importante, segun Tommaso.

El a bisa ku nan tei di awor padilanti pa kompartí nan punto di bista i enkurashá debatenan. Nan ta kere ku tin un solushon i nan responsabilidat ta pa esaki por sosodé. I p’esei tambe ta trahando huntu ku otro kompanianan, por ehèmpel awor ku nan a logra drenta Merka, pa asina trese e konsientisashon aun mas grandi den mundu kompleto. E ta konvensí ku mas por keda hasí i konsentrá riba e humadónan. El a bisa tambe ku tin pais kaminda e diálogo ku gobièrnu nan ta bon pero otro kaminda nan tin di lucha pa logr’é. Pero e énfasis lo keda pa logra drei humadónan pa e sigarianan alternativo, den e kaso di PMI, e IQOS ku ta kalent’é e tabako pero no ta kima esaki.

Integrashon di e redukshon di daño di tabako den e práktikanan di salú diario.....

Un di e debatenan sigur ku a hala atenshon tabata integrashon di e redukshon di daño di tabako den práktikanan di salú diario. Si un hende ke kambia algu pa un bon motibu dikon tin di kastigué pa e por hasié. Si e hende ke kambia di sigaria, esta e humamentu ku ta kousa daño i e ke bai over na e sigaria alternativo dikon tin di kastigué, i bin ku leinan ku ta prohibí esaki, manera ta e kaso den sierto paisnan aktualmente. Durante di e debate tabatin diferente dòkter ku a hiba palabra i trese nan eksperensia dilanti. Dòkter di pulmon i kardiólogo ta esnan ku mas a mustra riba e benefishinan ku e kambio aki ta trese kuné. Si ta bisa ku tabako ta malu anto mester prohibié i si no prohibié mester permití e produktonan ménos peligroso drenta merkado legalmente. Humamentu no ta di awe pero tin mas di 5 mil aña bieu. Hende semper tabata huma i mayoria biaha komo terapia. Nikotina ta e di dos droga faborito despues di alkohòl. Esnan ku ta huma ta muri di forma prematuro. E dòkternan a mustra ku tin mas hende ta muri di humamentu, ku tin ta muri di HIV òf asta Malaria i tuberkulósis. E organisashon Mundial di salú ta kalkulá ku pa fin di siglo mil mion di persona a muri pa un enfermedat relashoná ku e kustumber di humamentu. Esaki ta un emergensia pa salú públiko na nivel global. Ta esensial pa personanan den henter mundu tin akseso i nan stòp ku sigaria i kombertí esaki den produktonan di nikotina sigur.

Humamentu ta un rísiko mundial pa salú ounke mester bisa ku humamentu ta disminuyendo den hopi pais riku pero no manera dòkternan ke pero di otro banda den paisnan pober e ta oumentando.

E milager....

 Fiona Patten ta miembro di e region metropolitana di nort i di e konseho legislativo di parlamento di Victoria. El a bisa ku no solamente e ta un polítiko na Oustralia, pero e ta un kriminal, un kriminal pasobra e ta vape. E ta un delinkuente pasobra e no tin un reseta pa yega na produktonan di nikotina mas sigur. Sinembargo e no tin mester di unu pa e kumpra sigaria.

E ta huma for di mucha i tur hende a bisé ku e mester stòp di huma, pero e tabata difísil. Ora Vapor a bin e tabata un milager pe. El a haña un kaminda, un forma nobo pa e por a huma tòg pero di forma alternativo. El a splika ku na Oustralia nikotina ta ilegal pero sigaria no. E mester di nikotina pa e konsentrá. E ta konsiente ku si un hende kometé un pika, e tin di para pa e konsekuensianan kual ta nifiká ku e sa kiko e humamentu ta i tabata trese kuné.  I p’esei e ta kontentu ku awe e ta usa nikotina sin konsekuensia. Komo ehèmpel el a mustra riba e marka Kodak ku a dura 7 aña pa trese kambio, ke men meskos por sosodé ku sigaria. E dòkter a bisa ku nan ta hasi tur kos pa yuda hende stòp di huma pa asina por skapa bida i sòru pa famianan no keda kibra ora nan sernan kerí ta muri for di un edat hóben. Mester duna e hende opshon i permití e opshon aki tambe. Si bo no ke nikotina anto mester prohibié. Si no prohibié anto mester buska solushon.

Hende tin bèrgwensa di kambia....

Loke a resaltá durante di e enkuentronan na Varsovia ta ku hende tin bèrgwensa di bisa ku nan ta pasa over di humamentu pa e sigaria alternativo. Nan tin bèrgwensa pa hende pensa ku ta por, nan no por sin sigaria.  Nan tin bèrgwensa pasobra nan no por stòp di huma. Tur produkto ku por stòp e hende di huma ta bon pero e mester sosodé di forma balansá. Humadónan no ta pashènt i no ta hendenan malu pero nan ta simplemente humadónan. No ta gaña hende bisando ku e formanan di sigaria nobo aki ta 100% sigur pero si e ta e alternativa pa skapa miónes di hende. Tur kos ta sinta den man di gobièrnunan pa trese e kambionan nesesario den nan legislashon di humamentu. Ta Merka e aña aki na luna di aprel FDA a aseptá pa e sigarianan alternativo den e kaso aki IQOS subi e merkado merikano. Esaki tabata un kambio grandi.  Tin otro paisnan ta tuma otro medidanan, un mas pisa ku otro manera oumento di impuesto. Esaki segun e presentadónan durante di e foro, lo no yuda pa hende stòp di huma. Ideal sigur ta pa hende stòp di huma pero si a lo ménos por logra pa nan kambia pa e produktonan alternativo ta un paso grandi den mehora salú públiko.