Premier: Tin medidanan prepará pa evitá plamamentu Covid

WILLEMSTAD.-Awe djaluna premier Eugene Rhuggenaath mes a dirigí su mes na komunidat mirando e kantidat di kasonan ku a bini aserka di hendenan ku a test positivo pa Covid-19. E kantidat di hendenan infektá ku Covid-19 ta kresiendo di forma hopi serio.

Premier Rhugenaath a indiká ku for di na momentu ku a habri Kòrsou bek pa mas moveshon lokal pa ekonomia por drai, kaminda skol i trabou a kuminsá bek i mas despues a habri pa turistanan tambe drenta e pais aki, tabata konosí ku esei ta trese rísiko kuné. Sinembargo e kantidat di kasonan ta den márgen ku loke a spera pues outoridatnan di salubridat tin e situashon bou di kontròl, pero ta importante pa mantené medidanan pa kuida. Gobièrnu a prepará medidanan di eskalashon pa evitá plamamentu di e vírus. Naturalmente ta tene e balansa ku situashon di pais. Gobièrnu ke evitá pa bai na fase 3 i 4 kual ta konosí komo ‘lockdown’ kompletu. Gobièrnu tin e responsabilidat, pero no por hasié su so, siudadano, doño di empresa i tur hende tin responsabilidat pa evitá ‘lockdown’. P’esei mester mantené distansia sosial i kuida. Premier ta kontentu di mira kon supermerkadonan, negoshinan i restorantnan ta tumando medida. Pues apelashon un bia mas na tur hende pa kuida nan mes, laba man i no pone man na kara. Kuida bo mes i nos grandinan, tene kontròl sosial i si bo mira un ser famia ku no ta kuida hala su atenshon pa e kòrda.

Mas aleu premier a bisa ku gobièrnu por bini ku regla pa eksigí sierto komportashon, pero ta hasi un apelashon si un no mester subi kaya pa algu hopi nesesario mihó keda kas. Esnan ku por traha kas, hasi esaki. Tin empresa ku tin posibilidat pa hende traha na kas, esei ta pone ku por kontené e plamamentu di e malesa.

No tin motibu pa pániko den enseñansa

enseñansa ta na kurason di mayoria hende i sigur na esun di premier Rhuggenaath. E ta enfatisá ku no tin niun motibu pa drenta pániko. Na momentu ku drenta informashon ku tin alumno òf hende ku ta traha na skol a test positivo mesora ta tuma medida. E menasa di Covid por lo pronto tei pa keda, pues asta si sera skol pa 2 siman, kòrda ku Covid lo tei ketu bai despues di e dos simannan ei. ‘P’esei e protokòlnan pa kuida ta keda na vigor. Finalmente premier a bisa ku e ministernan di su gabinete lo sigui evaluá diariamente e situashon i lo tuma konseho pa tuma medidanan adishonal kaminda tin mester. Mas detaye den edishon di EXTRA.