WILLEMSTAD.- No tin motibu pa ningun organisashon sindikal tin rabia riba e maneho di personal di Kontrolaria General, sigur si ta aplikando regla. Kontrolaria General ta duda ku sindikato lo ta kontra pa hiba un maneho a base di regla, algu ku Kontrolaria General tabata karesé di dje pa algun tempu. Asina nos informantenan a duna nos di konosé ayera komo reakshon riba ponensianan di un sentro sindikal ku a deklará di tin rabia riba e maneho di personal na Kontrolaria General.
E informantenan a splika EXTRA ku investigashonnan a demostrá ku Kontrolaria General tin kosnan pa drecha bou di su personal. A kuminsá pone struktura i enforsá reglanan. Entre otro tabatin algun aña kaba sin ku ta someté kada ken na un evaluashon den nan trabou. Den e situashon anterior tabata asina ku mayoria miembro di e personal (24) tabata haña oumento outomátiko, loke a pone ku salarionan a subi di un forma astronómiko.
Sentral sindikal i sindikalista mester komprondé i realisá ku Kontrolaria General no ta kualke entidat, ta un organisashon respetá, independiente i ku tin di hasi trabounan di kontròl ku hendenan kapasitá. Pero den e evaluashon a bin resultá ku tin ‘profeshonalnan’ ku no tabata sufisiente ekipá ni pa traha un rapòrt, pa no papia mes di investigá. Tin otronan ku a keda evaluá i kategorisá na nivel mas abou di loke nan tin na diploma. Es mas, un evaluashon general ku a ser hasí a pone Kontrolaria General entre e entidatnan ku ta paga salarionan haltu na hendenan ku no ta funshoná manera debe ser. Aki a papia di salarionan di riba 10 mil florin pa luna. No opstante esei a yega na sierto palabrashonnan ku kaminda ta nesesario lo a sòru pa e parti di (re)kapasitashon. Awor tur e palabrashonnan ta ser hasí atraves di e asosiashon di personal ku a ser lantá den Kontrolaria General.
Dado momentu a surgi un kiebro ku i den e asosiashon aki na momentu ku un funshonario dje grupo di servisio a tuma su retiro. E demas miembronan di e direktiva tambe a retirá despues, pensando ku sindikato lo por drenta sin mas. Pero a mustra nan ku no por bandoná un asosiashon dje forma ei sin ku ta remplasá esnan retirá.
Segun e informantenan, no ta problema ku sindikato ke drenta den Kontrolaria General, pero e kosnan tin di bai segun regla si. E.o. lo tin di tene un referèndem pa sa si por konta ku mayoria.
Finalmente segun e informantenan, nan a lamentá ku konstantemente ta trata di desakreditá e entidat aki, refiriendo aki na informashonnan ventilá den prensa riba dos funshonario ku lo a tuma nan retiro supuestamente pa motibunan personal. En bèrdat nan karta ofisial ta papia di motibunan personal, pero EXTRA ta opta di no bai den detaye ya ku meskos ku nan, nos tambe a primintí nos informantenan di mantené sierto informashonnan den sekresia!