“zachte heelmeesters maken stinkende wonden”

WILLEMSTAD.- E problema ku a surgi na Girobank no ta un kaso di awor, pero e ta data di seis aña kaba. For di e tempu aya por a tuma nota ku a trata na tur manera pa haña chines i otro gruponan pa tuma e banko, pero ta práktikamente imposibel pa niun invershonista/bankero bai tuma un banko ku tin un buraku negativo di algun shen mion florin. E ‘run’ riba Giro a kousa problema pa e banko pero na mes momentu a sòru pa tacha konfiansa di hinter e sektor finansiero. Sinembargo tin speransa. Si por logra ku ta hasi meskos ku Giro manera a hasi den pasado ku Dòk Maatschappij anto Kòrsou lo sali ganá. Un profeshonal ku hopi eksperensia den sektor finansiero ta duna su pensamentu na EXTRA.

Ta seis aña pasa a konstatá problemanan den Giro Bank, pero no a aktua ku e firmesa nesesario. Esnan den sektor finansiero a sinta i mira kon ta trata na hunta e herida ku salfi, ounke nan tabata bon konsiente for di e tempu ei ku e final lo yega. A purba bende Giro ku diferente grupo manera un grupo chines i asta a trata na forsa fondo di penshun APC pa tuma Giro, pero niun hende lo no tuma un banko ku buraku finansiero asina grandi.

Mester a atendé e problema di Giro mesora. Si gobièrnu lo por a haña e montante pa hinka aden lo tabata tremendo. Si no mester sera e banko i duna un areglo manera esun riba mesa pa paga tur spardó chikí te ku 10 mil florin. Di e forma ei mayoria ta keda trankil ounke e grupo chikí ku tin hopi sèn den e banko tambe lo sinti e efekto hopi fuerte. E banko ta bai bankrut meskos ku a sosodé ku Dòk i Insel.

Den e kaso di Giro ta asina ku riba djabièrnè atardi a manda un karta pa bankonan, pero no a informá públiko di nada, miéntras ta bisa pa no aseptá niun chek mas di Giro. Ta lógiko pa komprondé ku esaki lo okashoná un ‘run’ riba e banko. Djadumingu ni su djaluna tempran no a duna informashon kla na komunidat i kaminda lo por a splika ku esnan ku tin te 10 mil florin lo haña nan sèn garantisá. E loke a pasa na Giro tabatin un impakto hopi malu riba otro institutonan finansiero. E parti mas pió ta rumornan ku ta bisa ku sierto instituto ta bai malu, miéntras ku esei no ta bèrdat. E rumornan ei ta hinka e institutonan finansiero ei den problema sin ningun motibu. Hendenan ta kuminsá kuestioná stabilidat di institutonan i asta por sosodé ku ta kita sèn di un banko bai hiba na otro banko. E presidente interino di Banko Sentral a kere ku e lo por bai Ulanda i fia un suma grandi pa atendé problema di Giro, pero e no a tene kuenta ku ni pa hospital ku ta algu muchu mas importante ku Giro Ulanda no a bai di akuerdo pa fia sèn. Hospital ta 100 bia mas importante ku Giro i tòg no a logra yudansa ulandes. Tin hopi kompania di gobièrnu ku tin hopi sèn na Giro. Banko Sentral ta haña sla i ta wak gobièrnu pa solushon, pero gobièrnu no por. No ta korekto pa Banko Sentral ta wak den direkshon di gobièrnu pa solushon di e kaso di Giro. ‘Zachte heelmeesters...”. Mester a atendé Giro masha tempu kaba. Tur tempu a trata na bende Giro Bank ku e défisit den dje, pero esei no ta logra. Dikon no bende Giro su bienesnan, den esaki ta konta e portafolio di fiansanan bon i esnan ku no ta kumpli 100%, tambe tur edifisio i asta sistemanan ‘point of sale’. Tin bankonan i otro kompanianan lokal i den eksterior ku lo ta interesá. Bende loke si tin balor den Giro. Tin kompanianan ku lo ke amplia nan operashon i kumprando esakinan di Giro nan lo por sigui via di un instituto eksistente.

Meskos ku a hasi den kaso di Dòk ku Damen a drenta i meskos ku posiblemente lo bira e kaso ku refineria kaminda Klesch lo drenta. Un ‘doorstart’ ta ideal i lo suavisa e doló. Kòrsou lo sali ganá, ta esei ta importante.