Edishon Di Imprenta

Si tin un anochi den 50 aña ku mi ke biba bèk, ta Tumba 1984 ku ‘Habri Sera’

Komparti:

Gilbert “Gibi” Doran i Mercee Doran

Gilbert Doran ku nos tur konosé komo Gibi ta selebrando su 50 aña den farándula. Ta un logro hopi importante i sin ku e tabata sa su rumannan, famia i amigunan a hinka un homenahe den otro p’e. Esaki lo ta otro siman djabièrnè dia 9 di òktober. Ta algu grandi den Festival Center. Gibi i Mercee tabata serka nos den Djasabra kaminda el a konta su historia, su 50 aña den farándula.

Gibi na palabra; “Mi no ta un hende di selebrashon. Mi no sa selebrá mi aña i nada, pero ketu den ambiente chikí i awor Mercee nan a hinka mi den selebrashon. Ta un apresio enorme pa mi di loke nan ta hasiendo i mi no sa di nada nada”. Gibi ta wak bèk riba 50 aña ku hopi logro ku e tabatin. Lógikamente mei mei di éksito ta haña piedranan den kaminda, ku bo tin di bula i trompeká. Ta esei ta bida. Pero den gran mayoria mi ta mir’é satisfecho”.

 

Wise Guy style

Su mayornan a kont’é ku for di su 4 pa 5 aña el a demostrá e abilidatnan musikal. Su tata tabata músiko i djadumingu mainta ta dia di toka piesa. E ta kuminsá ku reflekshon i despues ta bai Internashonal ku ta Fania All Star, Celia Cruz ets ets ku nan bandanan. I despues na final ta bai bandanan lokal manera Doble R, Los Locos Samson ets ets. E kos ei tabata trigger Gibi. E ta kòrda kon e tabata sinta dilanti di spiker i bati klave. Loke a hala su atenshon ta ora su tata toka somontuno. I p’esei somontuno ta e ritmo ku mas e gusta. Su mama a kont’é ku e tabata bai misa ku nan i ora pastor bisa pa ban kanta, e ta kuminsá kanta realmente tur loke el a skucha durante di dia. Su mama mester a pidié pa baha bos..... Ku su 10 pa 11 aña  e tabatin su mes banda, un banda resiklá, usando materialnan ku e mes ta traha. E ta kòrda un negoshi ku ta bende instrumènt banda di kaminda ántes tabata Boekhandel St Agustinus. Einan e tabata bai ku su mama i ta kana wak e instrumèntnan, bai kas i imitá esakinan. Tur kos e tabata traha ku material ku e mes ta inventá. E banda tabata yama Wise Guy Style, forma ku su amigunan di bario, primunan i nan tabata organisá asta song festival den kurá. Tur bisiña tabata kooperá trahando kos dushi. Tabata algu masha agradabel i su mama i bisiñanan mes tabata sinta hurado pa skohe e ganadó. Loke ta frapant ta ku e piesanan ta e mes tabata komponé nan. Ku su mes letra, melodia inventá. Esei ya ta señal ku tin algu ta kushiná. Despues el a kuminsá partisipá na festivalnan di kanto. E promé tabata di Tele Fiesta ku Tante Irma. Einan el a sali promé finalista ku un komposishon di su tata “e mucha pusha e outo”. E ku e ganadó a bai representá Antia.

Promé bes den tumba

 

E desaroyo di Gibi a sigui asina, partisipando na diferente festival di kanto. El a partisipá na skolnan i miéntras tantu a bai siña toka piano na CCC entre otro serka Yùfrou Corri i serka Edsel Provence. El a bai lès pa e haña e konosementu básiko di akortnan di piano. Esei tabata algu positivo pe pasobra e sa kon hunga ku su melodianan. Asina a sigui e desaroyo i den tur festival di kanto e tabata den premio. El a representá su skol, den Isla Berde i hopi mas. Na 1980 el a bai festival di tumba di hende grandi ku Doble R. “MI no sa kon bin mi tata i Doble R a yega na un afsprak. Doble R semper tabata un inovador i ami a keda skohí. I despues mi tata a bisa mi ku Doble R tabata ke e mucha ku el a kompañá den festival di kanto. El a haña mi kurashi masha interesante. Einan a habri yen porta. Di einan mi a klasifiká i mi a bira interesante. Mi tabatin 15 aña partisipando den tumba siendo bo mester tin 16 aña, pero nan a hasi algu pa mi por a partisipá tambe”. Esei a sende un lus serka dòkter Heerenveen kende e aña ei tambe a partisipá ku Doble R. El a kuminsá asina ku festival di tumba pa mucha, Koprokamu.

 

Di un banda pa otro

 

Di einan Gibi a drenta e banda La Tremenda, formá pa mucha yòn i te awe e tin e basista Henry Emerenciana ku ta toka ku Gio. Gibi a hasi menshon di Típiko Juliet ku tabata su bisiña, nan a lanta huntu, i Edsel Juliet ta e promé ku a hinka palu di timbal den Gibi su man i siñ’é toka timbal. Gibi ta kòrda na 1979 ku el a bai  karnaval pa promé bia ku un banda, e tempu ei ku e tumba ganadó Sigui awó. Gibi a kanta den Serenada huntu ku Mercee, den koro di Misa ku famia Andrea ku nan tabata kanta periodo di Pasku misa di Aurora. Asina el a pasa diferente faseta i despues di La Tremenda a sigui Super Orkesta Fantástiko, a djòin ku Mondongo Special ku despues a bira Name. Name tabata un revolushon ku Roy Heerenveen na kabes. Einan el a konosé Cuco Cruz. Esei tabata un revolushon i un paso grandi den su bida. E ta kòrda e kansion di Manicur Pedicur Dollar.

Un stap grandi komo kompositor i lider musikal

 

Ku e piesa ei su tata a bolbe haña e yamada di Doble R ku e mester di dje pa e militá den e banda. El a keda pensa hopi pasobra e tabata ku su amigunan, hende yòn den Name i e lo mester dal un stap den hende mas grandi. Pero su tata a bis’é “bo por skohe pa dos kos, bo por skohe pa keda ku bo amigunan òf bo por skohe pa bo desaroyo musikal”. I esei tabata e chispa ku Gibi a bai pa e desaroyo i e no ta lamentá. Esei tabata su universidat musikal pa a kai den man di Rignald Recordino, pa su konosementu i hazañanan musikal. Einan Gibi a kaba di forma su mes. Despues di 4 aña el a haña e yamada di Andy Corasol ku e banda Explosivos pa e hasié un banda grandi na 1986. Gibi a bai Explosivos ku a bira Gibi i Explosivos. El a haña e chèns e ora ei pa ekspresá su mes komo kompositor i lider musikal. I el a trèk einan otro hende importante den su bida ku ta (deft) Uty Gregorio ku a kaba di yega di konservatorio.

 

Nunka bringa algu na moda pero djòin e

Gibi a konta nos kon el a eksperensiá e kambionan den e 50 aña ku e tin den farándula. Kosnan a kambia hopi. El a pasa den hopi periodo di kambio pero kada époka ku su kos i abo mester sa kon fangu i adaptá na dje. No por sinta kritiká si ántes tabata asina i awor no. E no ta lubidá e palabranan di su lider internashonal ku ta Ruben Blades ku a bisa pa ‘nunka bringa algu na moda pero djòin e’. Tabata e époka ku Salsa a pèrdè popularidat kontra reggaeton i salseronan kier a bringa reggaeton. Pero a djòin e i asina a tene salsa na bida. E kos ei tabata un lès pa Gibi pa usa e pensamentu ei i no bringa nada na moda. Urban a bin i mester djòin esaki i esei a hasi bida di ritmo kombiná largu.

Músiko for di nasementu

 

Gibi ta kere ku ser músiko ta bin for di su nasementu. Su opa tabata músiko pianista klásiko i a toka pa Bios Caracas boys. Su tata ku 18 aña mester a bai toka den Estrellas del Caribe pero e tempu ei toka den banda ta kos di bandidu. Un dia el a hui bai trein i a yega kas 10’or pero ta 8’or e mester tabata na kas. Su wela a kita e oloshi di su tata dal e abou kibr’é i bis’é kumpra otro pasobra e oloshi ei no ta traha. “E persona ku pa ami tabata esun ku tabata e yabi di mi desaroyo ta Rignald Recordino”, Gibi a enfatisá.

 

Ritmo kombiná

 

Ritmo kombiná ta idea di Gibi. Loke  a pone kai riba e idea ta pa Kòrsou tin su ritmo bailabel henter aña. Nos a mara tumba na karnaval, seú ta mara na temporada di seú, tambú na fin di aña. Esei ta e ritmonan mas popular. El a haña ku nos no tin ritmo di nos ku por toka henter aña. I asina el a kuminsá meskla karakternan impreshonante di kada un di e ritmonan ku ta trigger nos. Por ehèmpel un tempu soka tabata dikta i Gibi a kue e básiko di soka i merengue meskla i ku e haip di tempu, e kayente di e kampana i p’esei el a yam’e ritmo kombiná. Ta un meskla pa un ritmo ku ta suip nos i pa nos por baile.

 

Biba bai Laga nan

 

Gibi a konta nos kua komposishon den su 50 aña den farándula ta di un nifikashon mas sentimental. El a kontesta Biba Bai laga nan. Ta e komposishon di mas grandi di dje i a bira manera Happy Birthday to you. Sea grandi òf chikí semper ta pidié den fiesta. I asta e mucha yòn ta kant’é. Ta un komposishon di 1992 i te awe e ta un hit i ki ora e toka hende ta kant’é.

Semper huntu komo famia

 

Su ruman muhé, Mercee Doran a konta kon Gibi tabata na kas. “Mi ruman tabata masha bon mucha. Den su mundu di muzik. E mala mucha tabata ami i ora e hasi kos di mala mucha ta pasobra ami a bis’é ban”, Mercee a konta nos. E tabata un mucha obediente, gusta yuda for di chikí. E ku Gibi ta hopi pegá na otro. Mercee semper ta esun pa bisa ban hasi esaki i esaya i Gibi kier  a yuda. For di chikí nan a lanta den kas musikal. Hopi hende no konosé e rumannan grandi masha bon i Michael nan konosé via di Gio i Clartje tabata hopi yong. Pero e parti di kanta tabata Mercee i Gibi. Tabata un dushi hubentut i semper nan a sostené Gibi i asta bringa guera p’e, den bon i den malu. Semper ora di tuma desishon ta huntu nan ta tuma e desishonnan. E kambionan di Name pa bai Doble R, ta pasonan ku huntu nan a tuma. Nan komo famia semper a sostené i despues di sali for di Doble pa liderá Explosivos semper nan a para su tras. I ora di tuma desishon pa forma Gio tambe nan a para su tras. Nan komo ruman ta orguyoso di dje, nan a biba su kansionnan. Biba Bai Laga nan ta Gibi su kansion preferí i nan a puntr’é si e ta kere e por surpasá e kantika ei. Pa Mercee esei ta un kansion profundo ku tur hende grandi i chikí ta kant’é i e tin un mensahe tremendo. Asta ora Gibi tabata malu nan tabata preokupá i a biba su momentunan kuné. Mercee ta kere ku muzik ta tene bu na bida. E ta sana hopi kos. Gibi tin un motibu dikon el a bin na mundu. Su mishon ta pa trese kambio, trese inovashon den músika. Gibi no ta músiko so, pero for di chiki e ta masha kómiko”, Mercee a konta. “mi tata tabata un kómiko, aktor artista, eskritor, pero Gibi for di na kas ta imitá hende”, Mercee a konta. I p’esei mes e por a produsí Pronka mi i Happy Hour.

E idea a nase

 

Mercee ta kòrda un kolega di Gibi ku ta nan amigu di kas un dia a bin serka dje i a bis’é ku e ke proponé Gibi pa haña kondekorashon. Gibi ta un parlamentario aunke el a hasi hopi kos prodeo. Ora Mercee a bai informá, nan a bis’é ku e mester tin 10 aña sintá komo parlamentario i esei tabata aña pasá ora e tabatin 9 aña komo parlamentario. Mercee tabata traha su biografia i einan a nota ku Gibi ta kumpli e aña akí 50 aña den farándula. Mercee ta kòrda ku el a yama Michael su ruman i tambe Neti i a konta nan. Einan Michael a konta Mercee ku Manchi kier a hasi algu similar pa Gio promé ku Covid. I nan a yega asina serka Manchi. E reakshon di Manchi tabata positivo ku a bin ku su idea i pa wak kiko Mercee tin i pa hink’é den otro. E idea a nase; nan a sinta huntu, forma komishon ku Neti, Maria, Michael, Paco Nahr, George Walle, Bradley. Mercee kier a hasié bou di fundashon Betti Doran pasobra nan no tin sèn den kas i mester a buska yudansa. E plan a kuminsá kana asina for di sèptèmber aña pasá. Nan tabata reuní tur djaluna, despues a kambi’é pa djárason. Nan a plania tur kos pero a yega e momento ku mester a bisa Gibi, aunke e no mester sa tur kos. Nan a warda festival di tumba pasa i dia 19 di febrüari a pidié pa e bin papia ku un invershonista. I a kuminsá kana ku rueda di prensa na mei i siman pasa otro rueda di prensa. Gibi no sa detayadamente kiko presis ta bai pasa. Loke Gibi sa ku tin hopi artista i músiko.

Den farándula tin por gusta bu i otro no

 

Mercee a bisa ku semper e tin su ideanan grandi i a haña asta Beehives su tras. Ta un tim grandi i e kos ta birando mas i mas grandi. Nan a tuma nota hasiendo e preparashonnan pa e evento kuenta hende stima Gibi. Unda ku nan pasa ta bon so ta papia di Gibi. Ta for di chikí nan a lanta den farándula i nan tata semper a bisa ku den farándula hende por gusta bo i no gusta bo. Pero bo mester sòru pa tin bo harnas di krokodel bisti i sòru pa bo duna lo mehor. I si tòg nan kritiká, sigui bai. Nunka tur hende lo gusta bo. Dia 9 di òktober lo ta un eksperensia Úniko; Mercee a enfatisá. E show lo ta unu karu i grandi. Loke nan ta hasi algu ta anochi inolvidabel. E públiko lo pasa den eksperensia inolvidabel. Lo tin tur kos den stadion. I na final e fondo ku sobra lo tin un regalo pa pueblo di Korsou i pa Gibi....pero mas di esei Mercee no por a papia....ta un sorpresa.

 

Habri Sera ta keda históriko pa Gibi

Komo final nos kier a sa di Gibi ku si e tin di skohe un anochi den 50 aña den farándula pa e biba bèk kua e lo ta. I ku awa bashando di so wowo el a bisa ‘1984 tumba Habri Sera’. “na momentu ku mi a keda korona komo rei di tumba ku mi 19 aña tabata un momento históriko i bunita den mi bida ku te awe mi papia di dje mi ta emoshoná”.

 

 

Artíkulonan relashoná

Laga un komentario