SUISA/W’STAD.- Básikamente e loke Philip Morris International su deseo ta, pa sigaria bira algu di pasado. I awendia hasiendo uso di siensia i teknologia esei lo por ta e kaso por parte. Asina sr. Ignacio Gonzalez-Suarez di e kompania ariba menshoná a duna di konosé durante un presentashon di ekspertonan denominá komo “Technovation”. T’asina ku PMI ta e pionero den desaroyo di un sistema spesial i ku ta muchu mas plasentero i di ménos riesgo pa e humadó. Ta trata aki di e sistema di “Heated Tobacco” (IQOS) ku ta un alternativa pa e humadó. Den e kaso aki e sigaria ta ser kalentá en bes di kimá, i esei ta pone ku e supstansianan dañino pa bo kurpa ta keda atras i no ta resultá den bo sistema. Segun investigashonnan di PMI, e persona ku usa IQOS tin 95% ménos riesgo di ser afektá dor di e supstansianan ei kompará ku sigaria konvenshonal.
Den su presentashon sr. Gonzalez a trese dilanti ku sigaria konvenshonal lo por bira (parsialmente) algu di pasado, i awor tin siensia i teknologia ku por hasi esei. Nos tur sa ku lamentablemente sigaria di kombustion ta dañino pa salú di hende, i e realidat ta tambe ku por lo pronto lo sigui di tin humadó di sigaria di konvenshonal. Na mundu tin mas ku 1 miar humadó, pero hasiendo uso di siensia i teknologia esaki lo baha. I si nos ke mira e benefisionan, mester produsí algu ku ta akseptá ampliamente dor di e humadó, algu ku no tin hopi riesgo. PMI ta hasiendo invershonnan grandi pa logra un mundu “liber di huma”. Atraves di añanan e kantidat di humadó a keda redusí, pues tin progreso.
“Básikamente loke nos ke hasi ta di hasi sigaria algu di pasado, algu ku atraves di tempu lo bo mira den un museo”, segun Gonzalez. Pero PMI ta hasi esei pasobra ta un mester, i ademas pasobra e ta posibel! Teknologia a demonstrá ku lo por bini ku alternativa pa sigaria. Humamentu ta dañino, nos tur sa esei, e ta kontené nikotina, e ta adiktivo i por ta kousa di hopi malesa. Nikotina ta un dje motibunan prinsipal dikon e hende ta huma, ku e ta bira adikto. Pero e motibu prinsipal dikon hende ta bira malu ta e “kimamentu” dje sigaria, ku ta kousa eskape di e otro supstansianan ku ta mas dañino pa salú di hende.
Pero PMI tin komo meta pa evitá ku ta surgi humadónan nobo, i na di dos lugá pa trata ku esnan ku ta huma kaba pa nan stòp! Ofresiendo un alternativa ta un benefisio for di e perspektiva di salubridat. I PMI ta invertí miónes, miéntras ku tin un tim di mas ku 400 profeshonal ku diariamente ta hasi investigashon ku e mesun meta. PMI tin un kompromiso i prueba di esei ta e echo ku ta konta ku mas ku 4 mil patènt rònt mundu, i 6 mil pendiente. PMI por proba mundu ku e ta hasiendo loke el a primintí.