W’STAD/SUISA.- “Si bo no ta huma, no kuminsá! Si bo ta huma, stòp! Si bo no stòp, kambia!” Esei tabata e mensahe prinsipal di parti di sr. Tommaso di Giovanni durante un kumbre organisá resientemente pa e multinashonal Philip Morris International (PMI). T’asina ku e kumbre ei a keda organisá bou di e nòmber “Technovation” i EXTRA tabata un dje medionan di komunikashon den region ku a keda invitá. T’asina ku PMI ta e kompania tras di desaroyo dje sistema di “Heated Tobacco”, ku ta un alternativa real i ménos dañino pa humadónan rònt mundu. Usando e sistema aki e humadó tin 95% ménos riesgo di desaroyá malesanan ku te awor ta relashoná ku humamentu. E kumbre a ser tené den “Cube” na Geneva, Suisa, ku ta e sentro prinsipal pa produkshon di e sigaria i unda hopi investigashon ta tuma lugá.

Tommaso Di Giovanni

Den su presentashon sr. Di Giovanni kende ta Direktor di e parti di Komunikashon Global, a enfoká riba e importansia di siensia den desaroyo di produktonan ku por benefisiá e ser humano. Siensia i inovashon por tin un ròl grandi den esaki, i PMI ta kere ku ta mas ku tempu pa buska solushonnan mas kreativo pa e problema di humamentu.

Segun sr. Di Giovanni, masha tempu tabata reina e deseo pa hasi e produkto mas ‘safe’, pero no tabatin e teknologia. Pero awor si tin e! I por sierto, e edifisio (Cube) di PMI ta un prueba di esei. PMI no ta pretendé di bai kaba ku humamentu, i echo ta ku lo tin humadó pa hopi tempu i e kantidat lo no baha. Loke mester puntra ta kiko por hasi pa e grupo aki ku si a opta pa sigui huma. I mas avansá por ta den esaki, mihó e lo ta pa esnan ku ta huma, loke ta krea un situashon di “win win”, tur hende ta Sali ganadó. Stòp di huma no tabata un opshon mas, pues e ambishon tabata pa tur sigaria por ser remplasá dor di un alternativa. Unu ku no ta hasi daño na e kalidat di bida dje humadó i ku ta yuda salubridat.

Segun  direktor, ta hopi hende i hopi investigashon a ser hasí durante dékadanan riba e tereno aki pa por yega na produktonan konfiabel. Den prinsipio di añanan 2000 a lansa e promé produktonan, pero nan no tabata penetrá, aunke PMI tabata sigur ku e konsepto aki tabatin potensial.

“Pero nos ta yegando einan i nos tin un kompromiso ku e humadó. Prueba di esei ta ku awe tin alrededor di 7 mion humadó na mundu ku ta usando e sistema nobo di IQOS, i orguyosamente por bisa ku 7 for di kada 10 ta satisfecho kuné”, segun Di Giovanni.

El a bolbe enfatisá bisando ku PMI ta haña ku hende ku ta huma meresé un alternativa. Stòp di huma lo ta e mihó kos. Pero si no t’asina nan meresé un alternativa. Pues siensia i teknologia ta duna nan e alternativa ei awe! “Si bo no ta huma, no kuminsá! Si bo ta huma, stòp! Si bo no stòp, kambia!”