WILLEMSTAD. - En konekshon di nan selebrashon di nan di 9 lustro, Sokudi tur aña di nobo ta pone èkstra atenshon den luna di novèmber, ku ta luna ku ta pone énfasis riba e malesa di diabétis.

E loke ku ta hopi alarmante ta e sifranan ku IDF ta pronostiká. Segun sifranan 1e di kada 11 adulto ta sufri di Diabétis Mellitus (425 mion) i di kada 2 adulto ta kana rònt ku Diabétis Mellitus sin ta na altura di esaki, miéntras dos tersera parti di hendenan ku Diabétis Mellitus ta di e klase trahadó i asina por sigui ku mas sifra.

Pa loke ta trata e problema di diabétis aki na Kòrsou, tambe ta alarmante. For di e enkuesta ku tabatin na aña 2017, t’asina ku e porsentahe di hendenan adulto ku ta diabétiko aki na Kòrsou, a yega na 8%.

Si sigui e loke ku mundialmente ta keda bisá ku un riba kada 11 hende ta diabétiko, anto aki por papia di mas di 18% di hende aki na Kòrsou ku lo ta diabétiko. Pa un poblashon chikí di 160 mil hende ta hopi, asina Marianela de Lannoy dietista enkargá ku nutrishon empleá na Servisio di Salubridat Públiko a duna di konosé.

E loke ku ta opservá ta ku hopi hende ta konsiderá malesa diabétiko komo un kos normal, kaminda ku e no ta un malesa normal, pero un malesa ku mester kuida. Importante ta, pa detekt’é na tempu i trata e malesa aki i kuida kurpa.

Esaki ta e meta esta pa detektá e malesa na tempu pa motibu ku esaki ta pone ku ta prevení e malesa aki i skapa plaka pa e sektor di salubridat públiko.

International Diabetes Federation (IDF) a proklamá dia 14 di novèmber komo World Diabetes Day. Rònt Mundu ta hasiendo tur sorto di kampaña pa konsientisá hende di e impakto ku e malesa aki por tin i pa promové bon kuido, prevenshon i duna informashon tokante Diabétis Mellitus.

E maneho pa loke ta trata e malesa Diabétis Mellitus ta eksigí kuido diario, kòntròl regular, hiba un bida salú i edukashon permanente.

Mayoria hende aki na Kòrsou ku ta sufri di diabétis, tin e diabétis number 2 ku ta esun ku por prevení. P’esei mester konsientisá e komunidat aki ta hopi importante. Pues drecha e sistema di kome i kambia e estilo di bida i e chèns ta grandi por bira e malesa di suku bèk.

Mester bai purba esaki na Kòrsou, pa motibu ku si kompará sifranan mundialmente, e sifranan aki na Kòrsou ta hopi haltu kompará mundialmente.

E tema di aña aki ta ‘famia’ pa motibu ku den famia mester sostené e hende ku tin suku i gui’é i siña konosé e síntomanan serka un famia di malesa di suku.

Famianan tambe ta un punto di kontròl i ku ora tuma nota di sierto síntomanan,  por manda e persona  dòkter i asina e chèns tei ku por detektá e malesa tempran i drenta un kuido na tempu i evitá asina tur komplikashon.