WILLEMSTAD.-E montante ku SVB, banko di seguro sosial ta paga na AOV a subi na 2022 kompará ku 2021. E oumentu ta di 13.3% segun sifranan ofisial di SVB. Konkretamente SVB a paga 365.2 mion na AOV den 2021 i 378.4 mion na 2022. Kiko e sifra lo ta pa 2023?

Instansianan gubernamental ta indiká ku e kantidat di hende di edat ta oumentando den e komunidat aki tambe. Pa 31 di desèmber 2022 Kòrsou tabatin 1916 penshonado mas aserka pa kobra AOV. Si na 2021 48.955 hende a kobra AOV, na 2022 e kantidat tabata 50.642 penshonado.

Tin e fenómeno ku bastante ta bai biba den eksterior i ta sigui kobra e AOV. Di e kobradónan di AOV mayoria ta biba na Kòrsou (32.900). E ta siguí pa esnan ku ta biba na Hulanda (13.738) i e grupo ku ta biba na diferente otro parti di mundu (2.444). Tin un grupo di 1603 penshonado Aruba, ku ta kobra AOV na Kòrsou. Riba e islanan BES tin 491 hende ku ta kora AOV na Kòrsou i finalmente 368 hende na St. Maarten.

Manera ta konosí 28 febrüari 2013 a kambia e lei di Algemene Ouderdomsverzekering i e Landsverordening Algemeen Weduwen -en Wezenverzekering i a pone ku e edat di AOV a subi na 65 aña.

E asegurado ku entrante 1 mart 2013 tabatin 59 aña di edat  por a kuminsá kobra AOV na edat d 60. Hendenan ku 1 mart 2013 a yega edat di 57 òf 58 lo por a kobra nan AOV, pero pa kada aña ku e no tin 65 aña ainda ta e ta pèrdè 6% pa aña riba e suma ku e penshonado mester a risibí. Pero gobièrnu a redusí e deskuento di 6% pa aña na 3% pa aña. Pero mientrastantu ku no formalisá e redukshon di e deskuento den un kambio di lei ofisial, SVB  ta sigui konta 6% di deskuento riba e suma di AOV. Tambe a subi e prima AOV ku tur tratado ta paga di 13 pa 15%.