2 morto mas a kai

WILLMSTAD.-E situashon di Curaçao Medical Center (CMC) ta hopi serio i ya kaba mester a pidi yudansa na Aruba pasobra aki a yega e limit’é, esei minister di Salubridat i dr. Merkies di CMC a enfatisá awe un bia mas durante di e konferensia di prensa di gobièrnu. E minister a bisa ku ta trahando duru pa mas lihé posibel amplia e kapasidat di kuido e.o dor di hasi parti di edifisio di Sehos operashonal, bou di maneho di CMC. Tin medikonan ta yega for di eksterior pa reforsá e tim di CMC pasobra profeshonalnan lokal ta trahando inkansabel pa skapa bida.

Dr. Izzy Gerstenbluth a splika ku e dianan aki ta publiká e sifranan mas lat i tin un motibu pa esei. Simplemente ta asina ku e kantidat di tèstnan a subi, e kantidat di hendenan den hospital a subi. Ta trahando ku 3 laboratorio diferente i mester revisá tur e informashon kompilá hopi bon. Pa loke ta trata e sifranan di ayera Gerstenbluth a duna di konosé ku a drenta resultado di 1400 test ku a keda hasí i di esakinan 255 ta positivo. 87 persona a sali for di isolashon i tin 117 hende hospitalisá. E kantidat di kasonan aktivo ta 4354 i entretantu pa awe djaluna 5 di aprel e kantidat di mortonan a yega 50. Dos mas a bini aserka.

Mas aleu el a sigui splika ku e sifranan ta subi, anto i e motibu prinsipal ta ku e vírus a kambia. E vírus ta plama mas lihé i e ta komportando otro. Hendenan hóben ta bira malu i fayesé kontrali na e situashon anterior. P’esei ta importante pa frena e oumentu. E loke tur hende ta mirando awor aki esta e hendenan ku ta drenta hospital, ta esnan ku a keda infektá 10 dia pasá.

Tene kuenta ku e subida na hospital no a kaba, mester spera ku e ta sigui!

Ta yegando kaba kasi 50% di kamanan di CMC,ke men mester frena e oumentu ei pa awor aki. Mester hasi loke ta posibel pa evitá ku hendenan ta sigui bini huntu i sigui kontagiá otro. Mester tuma medida pero tur hende mester tene nan mes na e medidanan i e kos di mas importante pa awor aki ta pa bakuna. Mester yega 85% di poblashon ku a bakuna. Tin hende tin miedu i otro hendenan ta rabia pa e medidanan, Gerstenbluth a pidi tur hende pa bai bakuna pa asina nos por kuminsá bai bèk den direkshon di normal.