Próksimo wikènt, dia 31 di òktober Sigdia Lomp ta presentá un eksposishon di arte inspirá pa su wowonan. Tur loke e mira, esei e ta pinta. No solamente kuadro pero tambe e tin souvenier ku paisahe di Kòrsou riba dje. Esaki ta e di tres eksposishon ku Sigdia ta presentá i e bia aki e ta tuma lugá na Villa Carmen (lanthùis Hoenderberg). Tambe el a yega di partisipá na eksposishonnan na Venezuela. Den tur su eksposishonnan e obranan ta na benta ounke mester bisa ku tin vários ku ta reserva kaba.

Biba na Venezuela...

Sigdia Lomp a nase na Kòrsou i ku 6 aña a bai biba Venezuela pa 22 aña a keda einan. Despues a bin Kòrsou bèk kaminda el a kasa na Kranshi bieu, un di e lastu kasamentu na einan na 1999. Su yu a nase na Kòrsou. Komo mucha di milenio, yen energia i ánimo a trese goso na bida di Sigdia. Promé ku el a regresá Kòrsou, Sigdia a tuma otro desishon importante den su bida. Hopi hende por wak Sigdia i ta kòrda su kara den e programanan di ATM (Apstené Te Matrimonio) ku Diana Lomp, mama di Sigdia. I Sigdia tambe a sigui Kristu komo su salbador. Esei a trese hopi kambio den su bida. I no kambio di religiosidat pero un relashon personal  ku Kristu. I p'esei segun Sigdia ta importante pa tin Dios den bo bida i establesé un kontakto kuné i laga e guia bu i asina el a guia Sigdia ta e eksposishon aki.

Amor pa pinta fo’i 6 aña...

Sigdia ta kòrda ku su 6 aña di edat el a deskubrí ku e ta gusta pinta. El a splika Djasabra ku nunka su mayornan no sa zundr’é pasobra semper e ta masha bon mucha. Un dia el a hasi algu robes pa drechi i nan a mand’é sinta den huki. “Mi a bisa nan ku mi ta bai sinta den huki pero bosnan tin di duna mi un papel ku un pòtlot i mi ta sinta kuantu ratu ku bosnan ke. Einan mi amor pa pintamentu a kuminsá. Despues di un straf mi a haña e amor pa pinta”, Sigdia a splika nos.

Ku su 6 aña el a sigui pinta riba su mes, purba ku pòtlot, koló, stef, na rant i mira kiko e ta sali. Tambe ‘crepa’ i a yega na skucha kurpa en bes di pinta riba papel. “Esei ta di mi, semper un hende sa ku mi a pinta pasobra sea e kamisa ta sushi òf e saya òf e karson ta un manera desastroso.

Profeshon arkitekto...

Sigdia ta di profeshon arkitekto i e ta gusta papia di su pais i p'esei el a studia e parti di turismo i ora el a bin Kòrsou el a haña oportunidat pa bai un kurso pa e siña papia di su isla. Ounke ménos den hulandes, e ta pone mas atenshon na spañó i ingles. Ora el a bin Kòrsou bèk el a konsentrá riba e parti di restorashon i asina e ta komuniká ku doñonan di lanthùis i monumentonan i ounke nan ta papia hulandes, e ta dirigí su mes na ingles ku mihó e ta dominá. Komo arkitekto e tabata pone atenshon na e struktura di nos edifisionan mester keda pa asina respetá nos historia.

Mi gusta paisahe di Kòrsou...

“Semper mi a gusta mi isla i komo mi a biba otro kaminda, i mi ta haña Kòrsou parse Coro kaminda nos a biba pa 11 aña, masha hopi mes”. E hendenan, e kalor e manera ku ta festehá bida ta otro for di na Coro. I semper Sigdia a gusta wak laman, asina kla manera na Kòrsou i semper el a gusta pinta para i flornan ku asina tantu diferente koló. I ounke e tin paresido na esnan di Coro, e klaridat i e lus na Kòrsou ta hasié otro. I semper el a gusta pinta e paisahe di Kòrsou.

Loke mi ta mira...

E kosnan ku mas ta yama atenshon di Sigdia ta loke e ta mira. Masha poko e ta pinta òf pensa den e manera moderno òf apstrakto. I p'esei e ta gusta paisahe i loke e ta mira. I p'esei mes e eksposishon tei mira eseinan. Lo tin diferente kos manera un parti di blanku i pretu i lo eksponé algun lanthùis, algu ku tin di aber ku su profeshon di arkitekto, algu di su yu ku e ta orguyoso di dje i di su mes un outoretrato. Tambe e tin algun potrèt di Obama ku ta un presidente ku a impakt’é i mas aleu para, flor karanan típiko di nos yunan di Kòrsou, algun skritura di beibel e ta pone tras di loke e ta pintando.

Souvenier di Kòrsou...

Sigdia a traha diferente souvenier ku por haña tambe ku paisahe di Kòrsou riba dje. El a probechá durante di e lockdown pa pinta algun retrato masha chikí. Nan ta chikí pasobra ta un kaminda tabata habri ku e por a yega na e tipo di materialnan ei. I tòg el a hasi bon uso di nan i pinta. El a probechá traha magnet di nan, yabero i tambe a traha ‘muk ‘ku e materialnan chikí ei. E ke pa su produktonan ta kosnan ku por usa i no kosnan di prònk i ku no ta usa. I e kuadronan tambe ta bisa algu di Kòrsou i no ta loke mester para pensa hopi ta kiko e ta. “Un trinitaria di Kòrsou, un blenchi ku ta bula na Kòrsou, un trupial, un barika hel, un tuna, asina i hopi mas”. E souveniernan aki lo bai na benta sigur na Samsom i otro ta Phone House. I próksimamente Mensing tambe.

Traspasá konosementu...

Sigdia a bai un reto nobo den bida i esei ta kompartí loke e sa. E konosementu no por keda na e so pero e ke ofresé otro hende tambe, E ta kuminsá ku gruponan chikí na lanthùis Hoenderberg pa lès. Pero pronto e lo tin su kasita blou na Sta. Catharina kaminda e lo bai dediká pintamentu i lèsnan. Einan tin un bista masha bunita di nos isla kaminda for di balkon por wak te Kristofel, por wak te brùg. Ta un bista masha bunita ta kaminda por sinta hasi plenario i hopi mas.

Arte difísil aki...

Arte na Kòrsou ta hopi difísil i spesial den e parti oksidental komo ku akibanda nos ta hopi kreativo. Kada un di nos tin hopi di ofresé den e parti ei sea den arte kulinario den kushina, den arte ku nos mannan, ku papel, obra di man, kalbas, i nos mente ta masha kreativo. Dor di esei tin ora ta stroba un i otro di bai dilanti. Nos mester kuminsá uni pa duna balor na e arte di e region aki i asta kada un di nos tambe por sigui padilanti. E ta difísil ora bo kuminsá prinsipalmente i no tin e nòmber di e grandinan i ta masha difísil pa yega na nan pia. Sigdia tin apoyo di hopi hende ku ta yuda den e parti ei.

Balorá arte...

I ora nos ta papia di arte, Sigdia por bisa ku nos hendenan a kuminsá balorá arte na Kòrsou. E ta sinti ku awor aki e porta no ta hermétikamente será. Dia el a yega Kòrsou 20 aña pasá i a bai kasi e mesun lugánan i nan a preferá wak e produkto promé. Asina e tabata keda bèl i no ta haña respuesta. Awor aki e mente  a kuminsá habri kisas pa e temporada difísil ku nos a pasa i hende  a kuminsá haña balor na loke realmente nan tin rondó di nan. E lockdown a trese tempu pa e hende mes i balorá esun banda di bo. Esei ta loke tabata falta prinsipalmente pa e yu di tera. “Mi a usa e tempu aki papia ku ser supremo. Nos no a bin na e mundu aki djis pa pasa bai pero bo mester ta un balor agregá pa otronan. I p'esei mi a bin ku e idea pa pasa konosementu pa otronan tambe por siña di nan. Kosnan ku mi a siña komo arkitekto i restoradó. Mi ke sigui yuda mi isla”, Sigdia a bisa.

Eksposishon...

E eksposishon ta tuma lugá na lanthùis Hoenderberg, djis serka di e pòmp stashon di Hannenberg. Djis ora pasa e pòmp stashon, lora man robes ta haña un bògt, nèt einan un kas blou, number 8. E eksposishon ta dia 31 di òktober i e lo bai ta ku sita. Ta pidi pa registrá na telefòn 527-7023. Lo tuma 10 persona pa kada mei ora i despues e ta tuma 15 minüt pa e limpia i despues tuma e otro 10 persona. E eksposishon ta di 9 pa 12 or mèrdia, despues pouze i 6 or pa 8 or di anochi. I den kaso ku tin hopi reakshon lo wak si por pone un dia mas di eksposishon.