Gobièrnu tin ròl pa krea insentivo i baha lista di ònderstant

WILLEMSTAD.-Na Kòrsou tin krítika ku sierto okupashonnan no ta paga muchu bon, konsiderando e kosto di bida den e pais aki. Resientemente Institute for Professional Excellence (IPE) a start ku kurso pa vigilante spesialisá. Dr. Franklin Sluis ta splika ku den nan investigashon IPE tambe a keda konfrontá ku e reklamo ku e pago pa ‘low skilled jobs’ manera kamarera i vigilante ta suèldu mínimo. Den e pais aki tin hopi kupo di trabou ta habri, di diferente nivel. E realidat ta ku un porsentahe haltu di hendenan sin trabou tin solamente un edukashon básiko manera VSBO.

Gobièrnu mester inventarisá ken ta e hendenan ku ta kobra ònderstant i ku ta den posishon pa traha. Tin hende ku tin defisiensia ku ta pone ku nan no por traha, pero tin hopi ku si por traha. Gobièrnu por duna un kontribushon den sentido ku si ta 300 florin e hende ta risibí na ònderstant, lo por regla di tal manera ku durante di e promé seis lunanan e persona ku bai traha ta sigui risibí e 300 florin di ònderstant plùs e suèldu mínimo ku ta e salario. Na final di e periodo ta  laga e persona sigui kobra 50% di e plaka di ònderstant huntu ku su suèldu. Hasiendo esaki gobièrnu tambe ta spar sèn. Ademas esaki ta sirbi komo insentivo pa e hende bai traha pasobra di e forma aki e ta bai kobra mas ku solamente e ònderstant. Na opinion di e presidente di IPE, gobièrnu tin un ròl pa yuda krea fasilidatnan pa na momentu ku un persona ku tin ònderstant drenta e proseso laboral tin insentivonan. E insentivonan aki ta duna empuhe na e persona pa bai traha i na otro banda ta yuda gobièrnu redusí e lista di hendenan ku tin ònderstant. No ta na nodi pa inventá e wil, djis wak kon Hulanda ta kana e trayekto ei hopi tempu kaba.

E aspekto obligatorio

No mester inventá e wil, wak for di Hulanda òf Merka. Mester pone kondishon stringente pa e hende buska trabou i keda traha. No ta asina tampoko ku ta bai obligá un hende ku preparashon akadémiko pa bai traha den ‘housekeeping’ por ehèmpel. Sin embargo un hende ku un preparashon básiko por dun’e guia pa bai traha komo vigilante, kamarera òf otro. Ta wak hendenan di sierto preparashon i edat ku ta kobra ònderstant i ta hiba kombersashon ku nan pa nan bai sigui un kurso sertifiká, manera esnan di IPE, ku ta hasi e chèns pa e hende ei haña trabou hopi mas grandi. Ta hopi kupo di trabou ta bai habri. E kantidat di kamber ku ta bai habri na 2022 ta 30% mas tantu kompará ku 2021. Tin mester di sierto kantidat di hende pa diferente área.

E desaroyo aki ta bon pa hinter pais pasobra e hende ku sigui kurso i haña trabou ta bai gana un salario. Dependiendo na e hende mes su aktitut i prestashon e por sigui krese den su trabou i konsekuentemente e ta bai gana mihó. Esaki ta pone ku su forsa di kompra ta oumentá. Pues mas hende ta gasta mas sèn den ekonomia. E hendenan ei no ta paga mas belasting, pero ora nan hasi kompra mester paga OB pues ta un invershon ku gobièrnu ta bai haña bèk.

E preparashon komo agente di vigilansia i seguridat ta siña e kursista tambe kon duna servisio na kliente. No ta pa brinda servisio na turista so, pero sigur na lokalnan. Aparte di esei ta hopi importante pa siña kiko Kòrsou komo destinashon turístiko, kiko e pais aki ta ofresé. Pa por komuniká ta esensial un dominio básiko di sierto idioma. E kurso tin ingles i spañó básiko. Hopi importante ta e manera kon mester atendé ku otro, importansia di traha den ekipo i tambe leinan laboral pa asina e trahadó ta konosé su derecho i tambe su debernan. Pues esaki no ta solamente un kurso komo bewaker, pero ta duna e persona konosementu general pa e por sigui desaroyá den bida.

Salario ta mará na estudio, pero tambe pa su esfuerso, dedikashon ku e ta duna den su trabou. Un trahadó ku ta duna mas ku solamente ku e tarea básiko, sigur e lo keda rekompensa. E hende ku sigui kurso komo vigilante i seguridat no ta solamente pa traha den hotèl i hospitalidat. Definitivamente e hende aki por bai traha den banko i vários otro área.