WILLEMSTAD.- CHATA ta kere ku ta importante pa sigui organisá aktividatnan, pero di un manera responsabel, ya ku e vírùs ta presente ainda. Por ehèmpel, restorant i aktividatnan riba boto ketu bai ta permití solamente 50% di nan kapasidat. Segun e sektor esaki por bolbe na e kapasidat i okupashon normal, naturalmente teniendo kuenta ku distansia sosial i reglanan di higiena.

Otro aktividat kaminda mas hende ta bini huntu mester ta mas kontrolá, pa asina e proseso di kontròl di tèst i bakunashon na entrada por tuma lugá mihó.

Mas aleu un turista mester por usa su resultado di tèst negativo na entrada di nos pais pa sigui gosa di aktividatnan durante nan estadia. Al final, rekuperashon di turismo ta garantisá rekuperashon di nos ekonomia den su totalidat.

Despues di un reunion di introdukshon plasentero ku Minister di Desaroyo Ekonómiko, sra. Larmonie-Cecilia, CHATA a bai di akuerdo pa yuda kaminda por i konektá personanan en buska di un trabou ku e vakaturanan disponibel na e vários miembronan di CHATA. E kantidat di trabou disponibel den sektor di turismo i hospitalidat ta oumentando rápidamente i e sektor mester di hendenan kapasitá pa mantené nos servisio na un sierto nivel. Gobièrnu na su banda ke yuda esnan desempleá na kas pa haña un trabou mas pronto ku ta posibel i CHATA ta kontentu di por traha huntu pa logra esaki.

Un petishon a keda hasí pa ekstendé e sosten di NOW i TVL te luna di desèmber 2021. Kompanianan ainda no a risibí e pago di luna di mei i apesar ku merkado ta mehorando, e demanda pa e sosten ainda ta haltu komo ku mester paga personal i otro gastunan ta sigui akumulá. CHATA ta spera ku esaki ta keda aklará mas pronto ku ta posibel i ku e pago lo kontinuá pa organisashonnan ku mester di dje ainda pa rekuperá di e promé mitar di aña intensivo.