WILLEMSTAD.- Parlamento su siguiente 2 biahenan ta riba agènda. Ta trata di un biahe pa Jamaica i unu pa Atlanta. E biahenan ta riba agènda di reunion di Komishon Sentral, awe 7 yüni.

E biahe pa Jamaica ta tuma lugá di 12 pa 17 yüni i ta relashoná ku un konferensia anual  yamá “ Annual International Conference & Exhibition 2022” (AICE) ku ta tuma lugá na Montego Bay, Jamaica i ta inisiá 13 yüni. E konferensia ta organisá pa World Free Zone Organizationi ta spesialmente pa zonanan liber i entidat asosiá.

E di dos biahe ta relashoná ku e kampaña di promoshon di ofisina di turismo, CTB yamá “Curaçao Night with the Braves” ku lo tuma lugá di 22 pa 26 yüni na Atlanta. Tabata konosí ku aktual minister di Desaroyo Ekonómiko, Ruisandro Cijntje tabata ke a bini bèk ku e kampaña promoshonal aki ku a inisiá tempu ku Andruw Jones tabata hunga pa e ekipo di Atlanta Braves.

Awor ku tin 2 otro yu di Kòrsou ta hunga den e ekipo di Braves, esta Ozzie Albies i Kenley Jansen i pa kolmo Braves ta e aktual kampionnan di World Series, ta bolbe lansa e kampaña promoshonal di CTB i a invitá miembronan di parlamento tambe pa ta presente.