WILLEMSTAD.- Un delegashon di parlamento a sali djamars 28 yüni pa otro reunion di Parlatino ku ta tuma lugá na Panama. Ta trata di tene un silensio hermétiko rondó di e biahe probablemente debí na e krítika inmenso ku e aktual parlamento i gobièrnu ta hañando pa nan kantidat grandi di biahe miéntras ku pais no a rekuperá ainda for di e efektonan negativo di e pandemia di covid-19 i otro efektonan negativo okashoná pa e guera na Ukrania.

Informashon ku redakshon di EXTRA a logra optené ta indiká ku parlamentarionan Sheldry Osepa (PNP) i Ramon Yung (MFK) ta pa Panama, kaminda e reunion ta tuma lugá. Tabatin mas parlamentario ku ta forma parti di e komishon, pero nan a opta pa no bai di biahe, debí na entre otro selebrashon di Dia di Bandera 1e i 2 yüli awor.