WILLEMSTAD.- Fundashon Museo Tula/Komishon Nashonal konmemorashon 160 aña abolishon di sklabitut ta organisá un kurso maestro bou di nòmber ‘Sklabitut i reperashon den Karibe’. Djárason dia 5 di aprel a tuma lugá apertura i komienso di e kurso maestro, e masterclass di Komishon Nashonal pa Konmemorá 160 aña di abolishon di sklabitut. Ku e kurso akí e komishon ke duna formashon i informashon na públiko tokante sklabitut i reparashon pa konsientisá i motivá partisipante pa forma parti di un konmemorashon digno i respetuoso di konmemorashon di 160 aña di abolishon di sklabitut. E kurso ta den lus di e proseso di emansipashon dirigí riba de-kolonisashon i reparashon. E siguiente kurso ta djasabra 15 di aprel di 10’or di mainta pa 12’or di mèrdia, presentá pa sra. Christel Monsanto.
Den esaki lo atendé ku solushon pa un problema hopi aktual relashoná ku nos pasado di sklabitut, esta di buska e konekshon ku nos ansestronan den archivo i registronan di esklabo i di emansipashon i traha palu di famia. Un lektura mashá interesante, trese pa un eksperto riba tereno di genealogia.
Partisipashon ta grátis i inskripshon ta habrí. Pa partisipá por inskribí riba e wepsait di Fundashon Museo Tula na e sekshon di ‘masterclasses’ i registrá riba e kurso indiká. Pa informashon, por tuma kontakto ku e organisashon via sr. Tirso Francisca na tirsof1@yahoo.com.

Pim Senior di Museo Tula den e siguiente video ta splika tokante e kurso maestro