WILLEMSTAD.-  Korte di apelashon despues di a skucha ruman muhé i mama di e hobensita di apénas 6 aña e tempu ei, ku a keda asesiná pa Ashton Lake (58) na Sint Maarten 38 aña pasá,  a skucha e sikólogo Van De Vorst. E sikólogo a bisa ku di su banda, e no ta mira nesesidat mas pa kontinuá ku tratamentu sikológiko pa Lake, teniendo kuenta ku e ta kalkulá e peliger di residivista hopi abou.

E kaso a haña un otro buèlta despues ku ruman muhénan di e víktima a kuminsá ku un kampaña di firma pa rechasá petishon pa libertat di Lake.  Esei tabata e motibu ku e tribunal di Hof a pidi pa bolbe skucha e sikólogo. Segun e tribunal, OM a laga tradusí un pakete di reportahe di e sikólogo, Reclassering i tambe esnan mas krusial ku tabata e reportahenan di SDKK pa bolbe haña un bista di Lake su komportashon i pensamentu.

Sikólogo Van de Vorst a bisa, ku di su banda e no ta mira nesesidat mas pa kontinuá ku tratamentu sikológiko pa Lake, teniendo kuenta ku e ta kalkulá e peliger di residivista hopi abou.

Durante tratamentu di e kaso anterior, e  tribunal a duna di konosé ku e rapòrtnan di Lake ta mustra hopi bon i positivo. Su komportashon ta ekselente i el a kumpli kompletu ku su programa di resosialisashon den SDKK. Tambe el a pasa den e sekshon di e training pa kontrolá su agresividat ku éksito.

El a traha parti pafó di prizòn den algun proyekto ku a bai sublime.  Segun e rapòrtnan, Lake tin rèspèt pa tur hende den prizòn. E ta kumpli ku su sitanan i ta aktua den un manera hopi positivo. Si e tribunal di korte superior bai di akuerdo pa e bai bèk Anguila manera ta su deseo, komo kondishon e no por kometé niun echo kastigabel. Mester sigui tur regla ku nan imponé riba dje.

Lake a yama tur hende ku a yud’e danki pa nan aporte i a primintí ku nunka mas e lo bolbe kometé un akto asin’aki. El a bisa ku riba su mes e ke sigui buska yudansa di profeshonalnan, pa e keda riba e bon kaminda.

Despues di 38 aña tur kos lo ta nobo pe i aunke e tin su mente bon balansa, tòg e ke pa un hende sigui gui’e pa e keda riba e bon kaminda. E mes lo buska yudansa di sikiater i sikólogo. Lake a bisa ku el a siña hopi i ta kla pa drenta bèk den komunidat. E ke bai riba su mes na Anguila pero ke keda den serkania di su ruman muhé i un primu ku ta kla pa yud’e.

Na promé instante abogado general, su konseho pa ku eventual VI pa Lake, ta positivo pero ku un kondishon general, teniendo kuenta ke posishon ku Anguila lo tuma. Abogado general a bisa ku e lo biaha bai e pais pa wak kiko ta e posibilidatnan pa Lake.

E tribunal di Hof lo tuma desishon dia 6 di aprel binidero.