SBAB ta haña òrdu pa pone beslag riba plaka di entrada di evento

WILLEMSTAD.-Minister di Hustisia Shalten Hato a duna un reakshon masha problemátiko, segun minister di finansa Javier Silvania. Esaki ta relashoná ku e maneho rondó di eventonan ku minister di hustisia a presentá komo Vibrando. Na opinion di e titular di finansa, e echo ku su kolega di hustisia no ke pone komo eksigensia den e maneho di evento, ku organisadónan mester kumpli ku obligashonnan fiskal ta un asuntu hopi problemátiko pasobra kaha di gobièrnu ta kore e riesgo di keda sin haña e plaka di belasting ku ta toka pais. Minister Silvania a tuma komo ehèmpel e evento di algun aña pasá ku a karga e nòmber ‘Bombazo Latino’ ku a dal hendenan palu i kousa masha hopi problema.

Den un karta fecha 30 oktober minister Silvania ta pidi atenshon di su kolega pa e asuntu aki despues ku minister Hato a bisa ku Ministerio di Finansa por saka foyeto di informashon pa komunidat i spesialmente pa organisadónan di evento.

Minister Hato a splika su kolega Silvania ku ya kaba el a duna splikashon amplio den reunion di Konseho di Minister dia 12 di yüli último i ku e no ta mira e nesesidat pa mara obligashon pa kumpli ku aspektonan fiskal na e petishon di pèrmit. Hato ta indiká mas aleu ku e organisadónan por manda nan deklarashon na Stichting BAB despues di e evento. Minister Silvania ta insistí ku si duna espasio pa organisadónan haña nan pèrmit sin ku esaki ta mara pa nan kumpli ku nan obligashon fiskal, kaha di gobièrnu lo kai chikitu. E rísiko ta hopi grandi pa esei. Esaki ta un situashon hopi indeseabel.

Minister di finansa ta avisá ku si no kambia e asuntu anto SBAB lo bai aktua severo promé ku kada evento e.o konfiskando tur plaka di entrada. Esaki sigur lo ta kumbiní e promotornan. Den e kaso di ‘Bombazo Latino’ hendenan a bula den bar pa kue bebida pa mitigá nan pèrdida ku e evento. CTB tambe mester a saka 15.000 dòler pa paga artista pa skapa kara i reputashon di Kòrsou.

Ya kaba SBAB a haña òrdu pa aktua severo na e próksimo evento pa sòru ku tur organisadó ta kumpli. Den kaso ku e organisadó no kumpli lo pone beslag riba entrada ku kobra pa entrada. Tur konsekuensia negativo ta pa kuenta di minister Hato.