WILLEMSTAD.- CHATA a tene su promé reunion kuartal di miembresia. Na  e okashon aki e direktor di Merkadeo, Servisio i Desaroyo Aéreo di Curaçao International Airport a duna un update riba servisio aéreo i tambe e último desaroyonan.

Sra. Peggy Croes a duna e último desaroyonan riba servisio aéreo di parti di CAP. Durante su presentashon, sra. Croes a trata e skema di aerolíneanan pa e merkado Oropeo, Norte Amerikano, Sur Amerikano i Karibense, menshonando ku esaki por kambia ainda. Tambe el a menshoná ku apesar ku nos a pasa den tempunan difísil, CHATA ta hopi agradesido pa e restrikshonnan di biahe ku a keda suavisá pa gobièrnu.

Ta importante pa menshoná ku sin e merkado Oropeo, Kòrsou su servisio aéreo lo a baha aún mas signifikante, sinembargo ta importante tambe pa mantené un balansa den distribushon di nos asientonan. Tin vários oportunidat ku Kòrsou por benefisiá di dje i traha p’e, manera programa di vakunashon, pasaporte di salubridat, e corridor hel entre Amsterdam i Kòrsou, merkadeo dirigí pa nos destinashon por ilustrá su seguridat i trankilidat ku por resultá den un estímulo pa kompetensia di tarifa aéreo.

Despues di sra. Croes su presentashon, a pasa palabra pa Dr. Ashley Duits. Dòkter Duits a duna un splikashon amplio riba e bakuna i su funshonalidat, enfatisando ku un bakuna ta keda trahá i duná pa stimulá e mesun prosedura di un vírus ku ta penetrá e kurpa humano, pero sin de echo infektá e persona. E vakuna mes ta keda alrededor di 5 pa 7 dia den e kurpa i despues e antikuerponan mes lo sigui bringa e vírus. Aktualmente, tin alrededor di 162 vakuna den desaroyo pa e vírus di COVID-19.

Dr. Duits a bisa ku hopi konfiansa ku niun hende no a muri a konsekuensia di e vakuna aprobá pa FDA. Dòkter Duits a sigui informá ku e siman aki i otro siman, nan lo enfoká riba vakunashon di esnan mas vulnerabel i esnan ku ta traha den kuido. Ta kalkulá ku pa fin di otro siman, sobrá di poblashon por kuminsá vakuná. Pa logra imunidat di grupo, por lo ménos 80% di populashon mester keda vakuná.

CHATA lo sigui informá su miembronan riba último desaroyonan i ta sigui traha huntu ku tur kolaboradó pa logra su metanan.