Segun parlamentario hulandes i yu’i Kòrsou Heera Dijk (D66)

WILLEMSTAD.- Miembro di Tweede Kamer pa partido D66, Heera Dijk, ta di opinion ku ta hopi importante ku Parlamento di Kòrsou tin un bos esensial den e desishon di Kòrsou pa sigui ku pakete di pais (‘landspakketten’) òf nò. “Pakete di pais por ta importante pa pueblo di Kòrsou. Pero, na mi opinion, e úniko manera pa garantisá ku e lo ta un éksito ta ora Kòrsou i Hulanda lo traha huntu berdaderamente komo partner igual. Tambe ta importante ku no solamente Gobièrnu di Kòrsou ta deliberá tokante esaki. Gobièrnu di Kòrsou a bisa ku parlamento di e pais tin un bos importante den e desishon, komo bos di pueblo. Segun mi, esaki ta punto di bista hopi lógiko”, Dijk ta bisa den un entrevista ku Extra. Na su opinion no por ta asina ku Hulanda ta dirigí e trayekto. ‘Sin kooperashon estrecho entre Hulanda i Kòrsou, ehekushon di pakete di pais nunka por bira un éksito.’
Dijk: “Segun mi lo ta bon si Kòrsou ta sigui ku pakete di pais. Pero Hulanda i Kòrsou tin ku traha huntu den e ehekushon komo partner igual.”

Manera ta konosí, dia 22 di òktober parlamento di Kòrsou lo tuma un desishon tokante esaki. Dijk ta bishitá Kòrsou, Aruba i Boneiru komo miembro di komishon figo pa Relashonnan den Reino di Tweede Kamer. Nan a yega Kòrsou 20 di òktober den oranan di mèrdia. Djaweps 22 di òktober den oranan di mainta e komishon ta bai Boneiru.
Dijk su mama ta yu’i Kòrsou. Heera Dijk mes a nase i krese na Hulanda, pero e ta konsiderá su mes komo yu’i Kòrsou. Di tur 150 parlamentario na Hulanda e ta e úniko miembro ku rais na Kòrsou. “Pa e motibu ei un bishita na Kòrsou ta hopi spesial pa mi. Komo mucha nos a bai Kòrsou semper 1 bia pa aña.”

Durante su bishita aktual e komishon a bishitá Konseho di Minister. Durante e bishita minister-presidente, Gilmar ‘Pik’ Pisas, a duna e delegashon un splikashon di e deliberashonnan ku Gobièrnu Hulandes tokante finalisashon di e ‘Onderlinge regeling samenwerking bij hervormingen’ na aprel 2027. Pa prolongá e areglo, ta nesesario pa haña aprobashon di Parlamento, kual lo reuní ku Minister Pisas riba e tema akí djaweps, 22 di òktober próksimo.

Sekretario di estado, Eric van der Burg, (Relashonnan di Reino) a bisa Extra siman pasá den un entrevista ku Gobièrnu no a dun’é niun informashon na dje tokante e tópiko aki. “Mi tin ku respetá ku nan ta di opinion ku Parlamento tin ku tuma desishon i no Gobièrnu mes. Den luna di sèptèmber mi a manda un karta na Gobièrnu di Kòrsou, Aruba i St. Maarten. Den e karta mi a skirbi ku mi ta spera ku nos por tuma desishon pa sigui ku paketenan di pais mas lihé posibel. Hulanda ke sa si nos por tuma pasonan importante pa komunidat si òf nò. Si Kòrsou ta tuma desishon pa sigui, nos tin ku traha afsprak nobo. Hulanda tin 8 mion euro disponibel pa e paketenan.”

Dijk ta reakshoná: “Den e kòmbersashonnan ku nos tabatin na Kòrsou mi no a haña niun impreshon ku Kòrsou no ke sigui ku e trayekto di pakete di pais. Pero pa e pais ta hopi importante ku tur kos ta kana bon. Nan no ke tuma un desishon lihé lihé, pero bon pensá.” Na mesun momento e ta komprendé ku sekretario di estado tin un tiki purá. “Mi ta komprendé ámbos banda. Pero posishon di Kòrsou ta kla. Nan ke ku parlamento di Kòrsou ta reuní tokante e tópiko i despues tuma desishon.”