WILLEMSTAD.-Sindikato di enfermeria CBV ta na hospital nobo CMC unda a yama trahadónan pafó pa duna informashon riba desaroyonan kontra trahadó ku lo ta tumando lugá den e instituto. Algu ku e sindikato a interpretá komo bashamentu di gasolin riba kandela ta momentu ku ayera nochi lat gerensia a manda un mail pa trahadónan pa kòrda tur hende ku e regla di ‘no work no pay’ ta na vigor. A konsiderá ku ta intimidashon i provokashon di e trahadó.

Un kaso partikular ku a pone CBV bira mas aktivo ta e echo ku a duna retiro na un trahadó bastante hóben. CBV ta konsiderá ku e retiro aki ta inhustu i p’esei tambe nan ta den akshon pasobra meskos ku un hóben a haña retiro nan ta pensa ku gerensia lo por duna retiro di forma inhustu na mas trahadó.

Hopi trahadó a sali pafó pa asina skucha loke nan dirigentenan sindikal tin di bisa. Un otro punto ku a bira motibu di diskushon ta ku gerensia no kier a permití pa prensa ta aserka den e reunion. E dirigentenan sindikal a para riba ku nan no ta mira niun motibu pa kiko mester tene prensa pafó di e reunion. Presidente di CBV Johnsel Diaoen a bisa ku semper ta danki na prensa ku nan mensahe ta yega na trahadónan i tambe na komunidat pues nan no ke skonde e informashon pa prensa. CBV ta bai bek pa eksigí pa sinta na mesa.