WILLEMSTAD.- Un sindikalista aktivo ta kandidato prinsipal pa bira e siguiente hefe di büró di asuntunan interno ku Kuerpo Polisial di Kòrsou (KPC).

E puesto a bira vakante na momento ku e hefe di e büró aki, Ruisandro Cijntje a aseptá e posishon di minister den gabinete Pisas. KPC ta konfrontá tempunan difísil ku hopi problema interno bou di e personal. Hefe interino di kuerpo, Raymond Ellis mes a konfirmá esaki durante di e konferensia di prensa riba e susesonan na Marnix VSBO, bisando ku no por imaginá ta kuantu desishon riba medidanan disiplinario e ta firma riba un base regular.

Pa e motibu aki no ta deseabel pa e büró ku ta atendé ku asuntunan interno, ta sin un hefe.

Den e kuadro aki EXTRA a komprondé di fuentenan yegá na Ministerio di Hustisia, ku un sindikalista aktivo ta kandidato prinsipal pa remplasá Cijntje komo hefe di e büró.

E remplaso lo ta riba un base interino, mirando ku Cijntje a bandoná e funshon temporalmente pa e sirbi pais komo minister.