WILLEMSTAD.- Sindikato DOEN ke sa ta dikon gobièrnu ta hasi asuntu di skol den ‘lockdown’ kompliká. Dikon no ta sera skol for di mañan djárason 24 di mart i bai kue siman di fakansi ku ta kuminsá djaweps 1e di aprel.
Sindikato DOEN ta bisa despues di a tuma nota di e komunikado serio ku CMC a publiká djadumingu último, hopi ta esnan ku a sinti seriedat i embergadura ku situashon di salubridat di nos pais ta aden.
E konferensia di prensa di gobièrnu demishonario anunsiando ku entrante djárason awor, esta mañan 24 di mart ta apliká "lockdown", adishonalmente a trese tur e tenshon emoshonal bèk ariba ku tur trahadó den enseñansa a biba na mart aña pasá.
Den e mesun rosea promé minister ta papia di mantené skol habrí tòg den e situashon tenso akí, i ku un situashon di salubridat prekario.
"Wèl e desishon akí no ta kuadra ku niun lógika. Sea nos tur ta kuida òf bida normal ta sigui ku tur e konsekuensia ku esaki ta trese kuné!".
DOEN ke sa pa kiko hasi difísil. Djárason 31 di mart 2021 skol lo a sera pa 1 siman i mei den kuadro di fakansi di Pasku Grandi.
"Kuantu kos pa laga skol sera entrante 24 di mart 2021 ora ku 'lockdown' bai aden, pèrkurando ku nos tur konhuntamente ta yuda frena e kontagio?. Pakiko bini ku un maneho kompliká hasiendo e situashon tenso ainda mas tenso di loke ya esaki ta pa apénas 1 siman di skol?", ta loke ku e sindikato ta puntra su mes.
Sindikato DOEN ta opta i boga pa seguridat di trahadó, alumno i nan famia na promé lugá. Den e kuadro akí Sindikato DOEN ta yama un reunion general urgente via zoom awe djamars 23 di mart 2021 pa 7 or di anochi.