Polisnan miembro NAPB i ABVO a uni den lucha di SAP

WILLEMSTAD.- Sindikato SAP ku ta representá un kantidat di trahadónan den kuerpo polisial a duna oido na su miembronan. Mainta polisnan a bai reuní ku sindikato SAP pa diskutí e kantidat di problemanan ku nan ta konfrontando den e kuerpo. Yegando mèrdia e dirigentenan di SAP huntu ku algun miembro a bai reuní ku minister di hustisia Quincy Girigorie.

Den kombersashon ku dirigente sindikal Amado Vilchez el a duna di konosé na EXTRA ku nan a bai Punda pa reuní ku minister riba e kantidat di puntonan ku tin nan molestiá. E punto prinsipal ta posishon hurídiko di nan miembronan i na di dos lugá ta seguridat di e trahadó den tur sentido di palabra.

Riba e pregunta di EXTRA, dikon awor aki i no warda pa papia e puntonan ku e minister durante di e reunion plania pa e siman aki, e dirigente sindikal a bisa ku miembronan a lanta i eksigí di direktiva di SAP ku mester pone preshon awor i eksigí awor loke nan tin derecho riba dje.

Ta miembronan ta disidí, asina Vilchez a enfatisá! Minister i tur hende por tin nan opinion, pero SAP ta skucha su miembronan.

Riba esaki EXTRA a puntra si otro sindikatonan ku tambe ta representá trahadónan den polis ta partisipando den e lucha aki.Vilchez a duna di konosé ku e lucha aki ta sindikato SAP i su miembronan i tambe miembronan di ABVO i NAPB pasobra e dos sindikatonan ei no a skucha nan miembronan i p’esei e miembronan a akudí serka SAP.