WILLEMSTAD.-Sindikatonan ku ta representá trahadónan di Isla a tene un presentashon pa Parlamento. A duna splikashon detayá pa asina tur parlamentario ta bon informá kon e situashon ta na e momentunan aki. Sindikatonan tin miedu di ‘Strike 4’ den e esfuersonan ku Refineria di Kòrsou ta hasiendo pa logra haña un operadó pa e refineria.

Un frakaso atrobe lo nifiká ku pa desèmber 2020 alrededor di 400 tata i mama di kas lo mester bai kas pasobra RdK/CRU lo no por sigui ku e kantidat di trahadó na trabou. No mester lubidá ku ya kaba riba 70% di e trahadónan riba tereno di Isla ta kobrando 50% di salario.

Informashon ku EXTRA ta dispone di dje ta indiká ku ta surgiendo un situashon di basta tenshon serka kontratistanan. Aparentemente e kontratistanan a sera akuerdo di trabou 5 luna pasá i nan a kuminsá brinda e servisio i trabounan, pero te ainda no a firma ni e kontrakt. Banda di esei nan tin basta luna sin pago. Debí na e sirkunstansia aki e kontratistanan ta konfrontando problema ku banko.

EXTRA a buska kontakto ku direktor di RdK pero sin éksito. Otro informashon ku tambe a yega mesa di redakshon ta ku ainda RdK lo ta pendiente pa e kompania ku a firma akuerdo pa hür e instalashonnan na Bullenbaai por kumpli ku loke a keda primintí. E kompania a pidi ekstenshon di pago.

Kompanianan anónimo di gobièrnu tambe a reuní pensando strategia pasobra tur su negoshi ta dependé pa gran parti di moveshon de mundu petrolero. Ketu bai tin e grupo lokal ku ta interesá pa tuma operashon i maneho di e refineria mesora.