WILLEMSTAD.-Partidonan representá den e órgano di konsulta CGOA, esta gobièrnu i e sindikatonan ABVO, SITEK, STrAF, SAP i NAPB  den e reunion di 2 yüni último a yega na un akuerdo riba e suma ku gobièrnu a aloká riba presupuesto 2022 ku ta igual na e proposishon ku minister di BPD, Ornelio ‘Kid’ Martina a menshoná den su karta di 2  yüni 2022, esta un pago di plaka di fakansi di 3 porshento.

Tambe partidonan a kumbiní ku ámtenarnan i otro empleadonan ku un status igual lo kobra e suma aloká aki promé ku fin di yüni awor. Loke ku gobièrnu i e sindikatonan no a yega na un akuerdo riba dje ta ku ta yama e pago aki pago di plaka di fakansi di 3 porshento pa aña 2022. E sindikatonan ta preferá di kambia e nòmber aki den pago di gratifikashon òf un kompensashon.

E sindikatonan a yama un reunion awenochi 8’or pa tur miembro na sentro di rekreo Suffisant ku e meta pa duna tur informashon relashoná ku e 3 porshento ku gobièrnu ke paga. Segun e sindikatonan tin hopi insertidumbre kreá rondó di e tópiko aki i pa e motibu aki e sindikatonan ta bisa ku ta nan deber pa duna miembronan informashon korekto i debido.

E sindikatonan den deklarashonnan den prensa a indiká ku den e reunion di CGOA di 2 yüni siman pasá, a indiká na gobièrnu ku no ta aseptá un pago di 3 porshento di plaka di fakansi i ku a manda minister Martina bèk di Konseho di Minister pa atendé pago di 6 porshento di plaka di fakansi manera a eliminá esaki na 2021.