WILLEMSTAD.- Sindikatonan representá den e Komishon Sentral di Sindikatonan (CCvV) ta den preparashon pa kualke eventualidat. Djaweps 16 mei tin un reunion ekstraordinario di e órgano di konsulta entre gobièrnu i e sindikatonan, GOA. Den e reunion aki e sindikatonan ke haña kontesta konkreto riba diferente asuntu pendiente pa mas ku 1 aña kaba.
Den e kuadro aki e sindikatonan a reuní djaluna na sede di e sindikato di personal den enseñansa, Sitek pa asina palabrá strategia. Segun EXTRA por a komprondé durante e reunion tabatin un pensamentu komun ku den kaso ku minister di BPD, Ornelio ‘Kid’ Martina (PNP) no presentá ku kontestanan satisfaktorio den e reunion di 16 mei, ku esaki ta motibu pa sindikatonan poko poko pero sigur aktivá i kuminsá mobilisá miembronan den forma di suministrá informashon i konsulta ku nan kon pa sigui atendé ku e situashon reinante.

Den un karta di 8 mei pa presidente di e reunion di GOA e sindikatonan ta indiká ta kua ta e puntonan ku nan ke deliberá riba dje ku minister Martina. Un di e tópikonan prinsipal ku tin riba agènda ta adaptashon di e lei pa kòrta ku 12,5 porshento den kondishon laboral di ámtenarnan pa asina hasi pago di e benefishinan sekundario posibel atrobe.

E sindikatonan ta proponé pa adaptá e lei i garantisá pago di indeksashon di salario, “loontrede” i 3 porshento lumpsum di 2023 e aña aki mes. Otro punto riba agènda pa e reunion di GOA ta entre otro kambionan di e lei di penshun pa lòs indeksashon di penshun for di indeksashon di salario di ámtenar.
E sindikatonan ke sa ki dia nan por haña e dokumentonan relevante di e proposishon pa kambio di lei. Oumento di plaka di fakansi di 6 pa 8 porshento ta otro punto riba agènda ku sindikatonan ke tende di Martina su pensamentu riba dje.

Alabes e sindikatonan ke tende ki dia minister di Finansa ta presentá den GOA pa duna informashon riba realisashon di e organisashon nobo di servisio di impuesto (Nieuwe Belastingdienst). CCvV lo duna durante e reunion tambe su punto di bista riba adaptashon di e reglanan ora un empleado ta malu i no por traha.

Riba e proseso di solisitut den kuerpo polisial e sindikatonan ke tende ki dia minister di Hustisia, Shalten Hato lo duna un presentashon den reunion di GOA. Tambe e sindikatonan ke tende di minister Martina kiko punto di bista di gobièrnu ta pa trese uniformidat den kompensashon ku ta paga na personal den kadena hudisial den kaso di aksidente bou di ora di trabou.
Finalmente e sindikatonan ke sa ki dia ta risibí e dokumentonan relevante relashoná ku un areglo pa ora un ámtenar kumpli 45 aña den servisio. Banda di e 8 puntonan aki tin vários punto mas ku e sindikatonan ta pendiente di haña kontesta riba nan serka gobièrnu.

E sindikatonan ke keda den diálogo ku gobièrnu riba adaptá e lei di 12,5 porshento ku forsa retroaktivo te 1 yanüari 2021 i kon den futuro por paga indeksashon di salario, “loontrede” i lumpsum pa añanan 2021 i 2022 tambe. Un otro proposishon sindikal ta pa paga “loontrede” i 3 porshento lumpsum ku debe for di 2019 promé ku desèmber 2024.

ABVO den un karta apart pa minister Martina a bisa ku awor ku tin bista di realisashon di presupuesto 2023, por paga e debe di 2.8 mion na lumpsum di 2019 mas lihé ku ta posibel. Alabes ta proponé pa pago di loontrede 2019, ku ta un suma mas supstansial di alrededor di 30 mion florin, tuma lugá den 3 òf 4 pago plamá durante di 2024.

Di e forma aki e ámtenarnan no mester warda te desèmber 2024 pa podisé risibí e pago aki. Minister Martina den su palabrashon ku sindikatonan na desèmber 2023 a indiká ku lo paga e debe na lumpsum i “loontrede” huntu pa mas tardá desèmber 2024.

Dia 21 di febrüari e 5 sindikatonan representá den e komishon sentral di sindikatonan a manda un “aanmaning” pa gobièrnu denter di 30 dia duna kontesta kon ta bai paga loontrede, i 3% lumpsum ku debe for di 2019. E sindikatonan a menasá ku si no duna un kontesta ku lo tuma paso hurídiko kontra gobièrnu.