WILLEMSTAD.- Ayera despues di algun siman di preparashon, sindikatonan NAPB i SAP huntu ku nan miembronan a subi kaya i a repartí mas di 200 pakete na diferente famia rònt Kòrsou.

A repartí pakete di komestibel, pakete pa mucha, stof, fan, kolchon, pakete pa beibi, aparatonan elektróniko i tambe regalo na e chikitin nan.

E repartishon a tuma lugá for di Fuik te Bándabou.

Tur esaki tabata posibel ku sosten di e komersiantenan ku a kere den e proyekto i mesora a duna un man apesar ku e situashon na Kòrsou no ta esun mihó.

Sindikatonan NAPB i SAP a karga e proyekto aki i huntu ku e komersiantenan i nan miembronan a sòru di hasi hopi famia ku tin e un tiki difísil, un tiki kontentu pa e último dianan di aña.