WILLEMSTAD.- Aqualectra ta kla pa lansa e sistema di pagatinu riba meternan di awa. Esaki Derick Jonis direktor di Aqualectra a duna di konosé na EXTRA, den un kombersashon ayera.

Segun Jonis debí na e medidanan di COVID mester a wanta ku e lansamentu.

El a bisa ta bon tòg ku nan a wanta, pa motibu ku por ehèmpel riba djadumingu e siudadano no por sali bai kumpra su awa den e Toke de Keda aki i mirando ku awa ta esensial pa laba man i tambe higiena prinsipalmente den e situashon ku nos ta aden aworakí.

Jonis a bisa ku téknikamente e sistema ta kla pa wòrdu lansá.

Pa loke ta trata e proyekto ku gobièrnu di Kòrsou aña pasá a bin kuné pa konektá i stòp di deskonektá awa durante e pandemia di COVID, Jonis a bisa ku nan a kumpli debidamente kuné. El a splika ku awa ta e yabi klave pa yuda eliminá e vírus di COVID i p’esei mes nan no ta kòrtando awa por lo pronto.

E siudadano tabatin chèns pa  drenta areglo di pago. Segun Jonis tin ku a kumpli manera mester ta, pero meskos tin ku a bolbe kai den debe i no a paga mas. Pero pa aworakí Aqualectra ta kòrtando solamente koriente.