Segun abogado Sulvaran ta denunsiá

WILLEMSTAD.- Ta konsiderá e yu di Kòrsou ku a studia lei na Kòrsou inferior. Esnan ku logra drenta mes ta obligá pa traha komo pro deo, pasobra nan ta yu di Kòrsou i a studia akinan. Yunan di tera ku a studia na Hulanda tambe konfrontá ku e deskriminashon aki. P’esei ta balotá nan i konsiderá nan inferior den un sistema kolonial te den su igra, abogado Eldon ‘Peppie’ Sulvaran a trese dilanti ayera durante un reunion tékniko.

Despues ku órden di abogado a duna su opinion riba e lei nobo di abogasia ku ta na parlamento, Sulvaran i Chester Peterson ku no ta miembro mas di órden di abogado a duna nan banda di e medaya. E dos abogadonan a traha riba un nota di kambio riba e lei i a splika ku esaki ta nesesario pa protehá yunan di tera ku a studia lei i ku tin ku buska un manera pa funshoná den un sektor ku den nan bista ta diskriminatorio.

“Si nan logra bira abogado mes ta un eksistensia marginal ta warda nan. E bolo di pro deo ta bira dia pa dia mas chikí i tin ku warda largu promé ku haña un kaso. E ta paga malu i mester warda un eternidat pa haña pago”, Sulvaran a splika parlamento.

E ta bisa ku ta e sistema aki órden di abogado ke sigui mantené na bida i tene habrí pa esnan ku no ta papia papiamentu por sigui marginá e yu di tera. “Un sistema kaminda e yu di tera no por haña un patron pa e por bira abogado. Un abogado ku ta traha pro deo di baina por tene su kabes riba awa te pa e tuma un stazjèr den servisio ku e no por paga. Di e forma aki tambe ta tene yunan di tera afó.”

Segun Sulvaran ta danki Dios na algun yu di Kòrsou skèrpi a logra dos biaha para e intenshon pa mantené porta habrí i pa tur ku no ta di Kòrsou i no ta papia nos idioma pa drenta sin niun klase di limitashon. “Tòg ta purba atrobe manera menshoná den artíkulo 2A di e proposishon di lei. Ke permití esnan ku no a siña nos leinan i no ta dominá nos sistema di derecho sufisiente pa drenta 3 aña sin kumpli ku niun eksigensia. Mester bòm e intento aki tambe pasobra e ta un falta di rèspèt.”

E ta opiná ku artíkulo 2A di e proposishon di lei lo hasi posibel pa sigui tuma stazjèr ku no ta yu di tera pa 3 aña den servisio i mantené un sistema na bida ku ta marginá i sigui tene e yu di tera di abla papiamentu afó. “Un sistema di deskriminashon institushonalisá ku pa siglo kaba ta perhudiká nos hendenan.”

Proposishon

Ta den e kuadro aki Sulvaran i Peterson a aserká 2 di e profesornan mas renombrá di Hulanda, Jan Reijntjes i Steijn Franken i huntu a traha nota di kambio. “Dikon 2 profesor hulandes? Nos no tabata ke nan tilda nos di deskriminashon. Nos tin eksperensia ku esaki kaba”, Sulvaran a splika.

E ta mustra ku Reijntjes tabata un profesor invitá hopi aña na universidat di Kòrsou. “E sa bon kiko e ta papia di dje. Básikamente ta 2 kambio ta importante: promé ku por traha komo abogado na Kòrsou mester studia papiamentu i e materia ku ta diferente promé ku por bira abogado. No por duna eksepshon pasobra lo ta ku e yu di tera lo sufri e konsekuensia di e eksepshon aki.”

Sulvaran ta bisa ku tin algun punto mas den e proposishon di lei di abogasia ku tin problema kuné, pero no por keda para riba tur kos sino no ta logra e puntonan mas importante. “Ta 12 aña nos tin ta lucha pa e kos aki. Palabra ta na parlamento.”

Tambe Sulvaran a para ketu na loke e ta yama argumentonan ridíkulo pa blòkia e yu di Kòrsou mas ku 10 aña kaba. E promé ta ku hues i fiskal ta bini di Hulanda, pues abogadonan di Hulanda tambe por traha na Kòrsou. “Ami no tin problema pa laga huesnan i fiskalnan tambe pasa un prueba básiko di papiamentu i sigui kurso riba diferensia di materia, pero nos mester wak interesnan partikular di abogasia i di nos poblashon.” Banda di esaki Sulvaran ta bisa ku e komparashon ta di dos kos kompletamente diferente i no tin base. “Huesnan i fiskal si ta usa traduktor i di un manera kontrolabel den korte.”

El a sigui bisa: “Komo abogado bo no por hasi e kos ei. No por trese terser aserka ku no tin nada di aber ku asuntu di un kliente. Ta trata di asuntunan delikado. Mester por sa diferensianan”

Otro argumentashon ku Sulvaran no ta di akuerdo kuné ta ku ora pone kondishon pa abogadonan yu di Kòrsou ku a studia na Hulanda ku nan lo skohe pa keda traha na Hulanda pasobra nan mester hasi esfuersonan èkstra pa traha na Kòrsou. “E argumentashon aki  lo no konta pa esnan ku realmente ke bin traha pa yuda nan pais. Tambe t’asina ku komo yunan di Kòrsou nan tin sufisiente konosementu di e papiamentu kaba.”, esta Sulvaran.

Foto:

...Abogadonan Sulvaran i Peterson den sala di parlamento...