WILLEMSTAD.- Gobièrnu di Kòrsou na yüni 2016 a introdusí Lokèt Digital riba su wèpsait www.gobiernu.cw. Un kliente mes por subi i traha su sita pa entre otro pasport, Reibeweis, sédula òf Domeinbeheer ‘online’.  Na e momento aki Ministerio di Gobernashon, Planifikashon i Servisio ta traha na solushoná un molèster ku e sistema aktual ta kousa. Ta bai aktualisá e sistema pa traha afsprak ku e meta pa duna siudadanonan ainda un mihó servisio. Di e manera aki por evitá sitanan dòbel i kual lo nifiká ku mas sita lo bini liber pa públiko.

Servisio Públiko i Lokèt di Pèrmit konhuntamente ta hasi uso di e sistema di traha afsprak. Ministerio di Gobernashon Planifikashon i Servisio ta trahando duru pa hisa e kalidat di servisio pa komunidat. Ta bai aktualisá e  sistema yamá Lokèt Digital. Lamentablemente e trabounan pa aktualisá ta trese kuné ku e sistema lo no ta funshonal 5 i 6 di febrüari 2019, pues e siman aki djamars i djárason. Durante e 2 dianan menshoná lo no por traha sita ni ‘online’ ni tampoko personal òf telefónikamente na Lokèt di Pèrmit, departamento Bentana di Informashon. Djaweps benidero e sistema lo ta funshonal bèk ku mehoransa den trahamentu di sita. Ministerio Gobernashon, Planifikashon i Servisio ta spera ku tur kliente ta tuma bon nota di e informashon aki i ku asina aki e por sigui brinda un mas mihó servisio na komunidat. Nos diskulpa pa kualkier inkumbiniensia.

Pa mas informashon relashoná ku e tópiko ariba menshoná por tuma kontakto ku Bentana di Informashon na 0800 1515.