Dosentenan su kana a yena!

WILLEMSTAD.- Trahadónan den enseñansa, spesífikamente dosentenan a intensifiká nan akshon awe huntu ku nan sindikato Sitek. Na algun sitio na Kòrsou grupo di dosentenan a subi kaya i tene nan akshon di protesta. Na Palu Blanku por a mira kon dosentenan tin basora den man ta bari riba kaya. último dianan dosentenan, spesialmente di skolnan públiko su kana a yena despues ku pa algun tempu kaba nan ta mustra riba e echo ku no tin limpiesa adekuá ta tuma lugá na skolnan.

Esaki ta un bista na Palu Blanku unda miembronan di Sitek ta riba kaya ku nan basora. Si ke pa nan limpia nan klas ku mas ku 30 mucha i tur e problemanan sosial, nan a pensa ku nan ta kuminsá bari riba kaya den forma di protesta.

A parse ku e akshonnan lo no tabata muchu eksitoso riba e promé dianan, pero for di ayera nochi den reunion e miembronan di Sitek a pone preshon riba nan sindikato pa aktua ku mas firmesa. Di parti di gobièrnu a saka un komunikado pa bisa ku debí na asuntunan di presupuesto den yanüari asuntunan lo a kai un poko mas lat, pero ku ya kaba a regla kontrakt i pago di e kompanianan ku ta hasi limpiesa.

Direktiva di Skol Katóliko a bisa ku nan tambe ta konfrontá problema, debí ku gobièrnu a kòrta den supsidio, sinembargo nan ta kòrta den otro gastunan nesesario i ta usa e plaka pa limpiesa adekuá na skolnan. Mas detaye den edishon di EXTRA.