WILLEMSTAD.- Direktiva di SITEK, ta sigui duna su aporte na informá i konsientisá komunidat pa kada un, kuida nos mes i kuida esnan rondó di nos.
Segun presidente di SITEK, pió ku mart 2020 nos ta den un situashon di presensia i menasa di vírus di Corona, esta COVID-19, ku ta pega mas lihé i ta mata mas lihé.
Komo sindikato di edukashon, ta karga e obligashon ku SITEK tambe mester sigui duna su aporte den e lucha pa kombatí e vírus di Corona.

Dia 22 di mart 2020 SITEK a publiká e promé edishon di “Ta asuntu di bida i salú”.
Awe SITEK ta na edishon 11. Kòrsou a kumpli hopi bon, siguiendo rekomendashonnan di gobièrnu, di dr. Gerstenbluth i su tim, tambe di tim di kalamidat ku sosten di kuerpo polisial asistí pa milisia di Kòrsou.
Aña pasá nos a kumpli hopi bon komo pueblo.
Awor e vírus a kambia, den sentido ku e ta kana mas lihé, infektá mas lihé i mata nos mas lihé, segun sr. Plantijn di SITEK.
Ta nifiká ku mester ta mas mihó harmá ku aña pasá. Nos mester protehá nos mes mas, unda ku nos ta. I protehá e hendenan rondó di nos mas.
Kòrsou, ban sigui kumpli ku tur e reglanan di higiena, tapaboka, distansia sosial, aglomerashon di hende i petishon pa keda kas. E vírus di Corona no ta mèldu unda e ta.
Anto e vírus no konosé koló polítiko. No ta kestion di Kòrsou so, ta un situashon mundial kaminda nos ta mira kuantu hende ta fayesé kada dia rònt mundu.
Pa finalisá, presidente di SITEK ta remarká ku “nos hendenan den enseñansa ta dispuesto na tuma e bakuna, pero SITEK ta kontra di e proseso ku formulario di kondishon di salú ku ta pasa den man di terser persona. Esaki mester kana entre e trahadó i instansia ku ta vakuná”.