WILLEMSTAD.- Sindikato SITEK a logra dos akuerdo for di e Kombenio di 2016 ku nan a firma ku gobièrnu. Ayera den rueda di prensa, presidente di SITEK, sr. Darius “Lio” Plantijn i minister di enseñansa sr. Steven Croes a elaborá riba e puntonan aki.

Sr. Plantijn a bisa ku djárason último SITEK a haña e grato notisia ku algu ku nan tin 15 aña ta bringa pe, ta bai kristalisá. Den kombenio ku SITEK firma na 2016 ku gobièrnu tin un tópiko ku yama “Fasilidat Sindikal”. Esei ta nifiká ku 1 biaha pa luna, miembronan di SITEK di direktiva i di konseho sindikal ta bai SITEK pa hasi trabounan di sindikato.

E miembronan ta traha na diferente direktiva di skolnan. Djárason SITEK a haña dekreto di minister ku ta ofisial, ku e dunando di trabou no por hasi fèrfelu pa miembronan haña liber pa bai traha na e sindikato.

Tambe tin e  pakete di sinku punto ku a wèlga 10 dia pa nan. Algun dje tópikonan a firma for di 2016.

Sr. Plantijn a bisa na momentu ku a reuní ku minister, a bisé ku no por yega 5 aña sin a logra niun dje puntonan aki. E sinku tópikonan ta: limpiesa i higiena na skol. Dor di COVID a mira ku e tópiko aki ta vigente den skolnan. Apesar di esaki, SITEK ta kere ku aki aya por perfekshon’é ainda; Tin e kambio di 32 ora pa siman na VSBO skol pa 27 ora. Direktivanan di Skol ku tin SVBO skolnan a haña enkargo pa wak punto negativo ora ku hasi e kambio. Nan a entrega esaki kaba na ministerio, i ministerio mester atendé pa desishon kai. Plantijn ta kere ku por ehekut’é den fase di 32 pa 30 i di 30 bai 27 ora. Ta un Landsbesluit ku a firma ku gobièrnu pues esaki tin di tuma lugá, segun Plantijn.

E otro punto ta evaluashon di trahadó den enseñansa. E presidente a bisa ku esaki ta hopi importante pasombra esei ta pone ku e  trahadó ta sigui traha na perfekshon i e muchanan ta haña mas mihó edukashon ku nan ta haña awor aki.

E otro punto ta e orario di trabou di e personal di sosten i dianan di vakashon. Plantijn a splika ku dosentenan tin 61 dia di fakansi i e personal no dosente tin ménos dia. Ke eliminá deskriminashon pa e personal no dosente tambe haña 61 dia. Naturalmente nan no ta haña e dianan liber pareu ku e dosentenan, pasobra tin momentu nan tin ku hasi trabou di inventarisashon i preparashon. Por ehèmpel den e promé siman di fakansi nan por keda na skol hasi tur trabou di inventarisashon i e último siman di fakansi nan ta bai skol pa preparashon pa aña eskolar nobo.

E di sinku punto t’esun tan diskutí di e promoshon di dosente A pa dosente B. Djárason minister Croes a informá SITEK ku pa 1 ougùstùs próksimo tur trahadó/dosente ku tin derecho di bira dosente B ta bira esaki ku e kambio ku ta bin kuné. Esaki ta inisio di tur punto ku SITEK tin firma ku gobièrnu.

Lio a bisa ta bon pa tin  landsbesluit riba e punto di promoshon A bai B.

Transporte eskolar i kompanianan ku ta transportá muchanan, fin di luna no a kobra nan entrada. Esaki minister ta atendé i den próksimo dianan, nan ta bai risibí nan entrada normal atrobe.

Otro diskushon ta e dianan liber di karnaval ku ta 8 febrüari i 15, 16 i 17 febrüari,: Pa lei i ofisialmente dianan 8, 15, 16 i 17 febrüari ta dia liber pa trahadónan den skol i muchanan. Si tin skol òf grupo ke hasi algu ku e muchanan e dia ei, esei ta pa kada ken su kuenta.

Finalmente sr. Plantijn a bisa ku tin kombenio firma na 2016 i tanten gobièrnunan no kaba di kumpli, ehekushon dje kombenio aki, nan no por bai hasi ningun palabrashon ku niun grupo òf otro hende ku ta pretendé ku ta sali na defensa di trahadónan den enseñansa i muchanan na Kòrsou.

Minister Steven Croes a bisa dia el a kuminsá dos luna pasa ainda e konvenio no tabata kana. Di forma hopi profeshonal, ministerio enseñansa, SITEK i minister mes a atendé ku e puntonan profundo i deliberá kon yega na un akuerdo. Pa minister i dosentenan i tur trahadó den enseñansa ta hopi importante p’e. P’esei ora el a bira minister di enseñansa, el a bisa ku su prioridat ta ku e kombenio aki gobièrnu por ehekutá esaki.

E ta hopi kontentu ku a yega na e akuerdo, a presente den Konseho di Minister i ku por ehekutá e punto aki. E tin hopi apresio pa tur dosente i tur trahadó den sektor enseñansa ku durante periodo di COVID mester a wak kon ta duna lès, tabatin dosente i muchanan malu. Tabatin hopi inkonbeniensia na skolnan.