Hendenan 30 – 40 aña variante britániko!

WILLEMSTAD.-E kantidat di kasonan di Covid ta oumentando den nos pais. Apesar di hopi atvertensia di dr. Izzy Gerstenbluth i hinter e tim di epidemiologia, premier Rhuggenaath i otronan tòg ta parse ku hendenan no ta realisá e seriedat di e situashon. Asta por haña e impreshon i por tende na sierto sitionan ku outoridatnan di salubridat ta ‘molestiá’ nos poblashon , ta ‘stroba’ nos hendenan di fiesta manera nan ta haña ta bon.

Mirando e situashon ku a surgi, Curaçao Medical Center ta kanselá tur operashon di djaluna 22 di mart i djamars 23 di mart ku no ta relatá na un emergensia. Lo yama pashèntnan pa traha otro sita. Ta dependé di e situashon si mester kanselá tur sobrá operashon di e siman aki. Tur sita di poliklínika si ta sigui normal.

Hopi mas tantu hende den kuido intensivo

Informashon ku EXTRA ta dispone di dje i ku CMC a konfirmá ta indiká ku e kantidat di hendenan ku ta test positivo ku Covid ta oumentando i den departamento di kuido intensivo e kantidat di kasonan a oumentá. Awe djadumingu e kantidat di pashènt di Covid hospitalisá a yega 23 di kua 11 den kuido intensivo. Di e 23 pashèntnan, 4 ta di Boneiru. E oumentu di kasonan a pone ku kuido intensivo mester a bira kompletamente dediká na Covid. A trasladá otro pashèntnan pa departamento di kurason.

E situashon aki ta pone un preshon enorme riba kuido intensivo i hinter e sistema di salubridat. No mester lubidá ku un kaso di aksidente serio, tiramentu etc. tur por tin nesesidat di haña kuido den kuido intensivo.

Hopi kaso di hendenan 30-40 aña den hospital debí na Covid

Spesialistanan ta tuma nota ku mas tantu hende di edat entre 30 – 40 aña ta keda infektá ku Covid. Esaki ta posiblemente un resultado di e variante nobo, esun britániko.

Algu hopi robes ta ku hendenan a kuminsá ta bai departamento di promé emergensia sin ku nan a tuma kontakto ku nan dòkter di kas. Esei ta kousa un situashon sumamente difísil na departamento di emergensia na hospital CMC. Mas detaye den edishon di EXTRA.